PRENSA

Noticias

Comisión Técnica de Xestión e Políticas Culturais (CCG). Rexistros1 a 21 de 21
  1. Inicio
  2. Prensa
  3. CTTXPC-CCG
16/10/2026

O ciclo «A cultura como refuxio» inaugúrase cunha xornada sobre cultura e reivindicacións feministas

O Consello da Cultura Galega (CCG) inaugura este luns 19 de outubro (a partir das 16:30 horas) o ciclo de pensamento e cultura “A cultura como refuxio” que pretende abrir un espazo de reflexión compartida arredor do papel que desempeña a cultura nun contexto contemporáneo marcado pola incerteza e as desigualdades, pero tamén pola reivindicación da identidade propia. A primeira sesión, titulada “O papel da cultura na (des)igualdade”, conta coa participación de Nuria Varela, Yolanda Domínguez e María Lapido e reflexiona sobre o papel da creación artística fronte ás desigualdades de xénero. A sesión coordinada por Uxía Caride é presencial e pode seguirse en directo no web do CCG e a canle de YouTube.
15/06/2026

Xinzo de Limia acolle o derradeiro escoitadoiro do ciclo “Migracións e Dereitos Culturais”

Xinzo de Limia acollerá este martes (a partir das 17:00 horas) o cuarto e último escoitadoiro do ciclo “Migracións e Dereitos Culturais” que organiza a Comisión de Xestión e Políticas Culturais, orientada a coñecer de primeira man as experiencias, necesidades e propostas da poboación migrante e dos axentes culturais de Galicia para avanzar na garantía dos dereitos culturais desde unha perspectiva intercultural. A coordinadora da comisión e secretaria do CCG, Paula Cabaleiro abre este encontro de traballo pechado ao público.
01/06/2026

Abre o ciclo “A cultura como refuxio” cunha reflexión sobre as sociedades da vixilancia

O Consello da Cultura Galega (CCG), a través da Comisión técnica de xestión e políticas culturais e a Sección de Pensamento, abre este martes (2 de xuño, 16:45 horas) a primeira sesión do ciclo “A cultura como refuxio”, unha iniciativa que nace coa vontade de abrir un espazo de reflexión compartida arredor do papel que desempeña a cultura nun contexto marcado pola aceleración tecnolóxica, a crecente dixitalización da vida cotiá e a sensación de exposición permanente que caracteriza as sociedades contemporáneas. “Sociedades da vixilancia” é o titulo desta xornada inaugural que analiza, da man de especialistas como Marta Peirano, o papel da cultura fronte ás lóxicas de control e monitorización. A sesión pode seguirse en directo desde o web do CCG e a canle de YouTube.
18/05/2026

O terceiro escoitadoiro sobre migracións e dereitos culturais escudriña proxectos da provincia de Pontevedra

O Centro Social A Nubeira de Vigo acollerá mañá martes, 19 de maio (17:00 horas) o terceiro dos encontros participativos centrados nas migracións e nos dereitos culturais, organizado pola Comisión Técnica da Xestión e Políticas Culturais do Consello da Cultura Galega (CCG) no marco do programa “Migracións e Dereitos Culturais. Comunicación e Cultura de Paz”. Trátase dunha xornada de reflexión e traballo colectivo que reunirá máis de trinta persoas e proxectos culturais, artísticos, sociais e institucionais vinculados ás migracións e á interculturalidade da provincia de Pontevedra. A presidenta do CCG, Rosario Álvarez; a coordinadora da comisión, Paula Cabaleiro; unha das coordinadoras da sesión, Marián Fernández; máis a concelleira de Benestar Social, Yolanda Aguiar, inaugurarán esta sesión de traballo pechada ao público.
21/04/2026

A Coruña acolle o segundo escoitadoiro sobre migracións e dereitos culturais

O Kiosko Alfonso da Coruña será escenario do segundo dos encontros participativos centrados nas migracións e nos dereitos culturais, organizado pola Comisión Técnica da Xestión e Políticas Culturais do Consello da Cultura Galega (CCG) no marco do programa “Migracións e Dereitos Culturais. Comunicación e Cultura de Paz”. Este escoitadoiro forma parte dun ciclo de catro encontros provinciais máis unha xornada final que buscan afondar, desde a escoita activa e o diálogo horizontal, na realidade cultural das comunidades migrantes en Galicia. A presidenta do CCG, Rosario Álvarez; a coordinadora da comisión, Paula Cabaleiro; o director da Área de Cultura do Concello da Coruña, Uxío Novo; máis a concelleira de Benestar social, Nereida María Canosa Domínguez, inaugurarán esta sesión pechada ao público.
23/03/2026

Comeza en Friol un programa que analizará as migracións e os dereitos culturais

A Comisión Técnica de Xestión e Políticas Culturais do Consello da Cultura Galega (CCG) organiza este martes no Museo Etnográfico de San Paio de Narla en Friol (a partir das 17:00 horas) a primeira sesión do programa “Migracións e Dereitos Culturais. Comunicación e Cultura de Paz”. É a posta en marcha dun proxecto que pretende estudar a situación real do acceso á cultura na nosa comunidade. A primeira das cinco sesións programadas contará cunha vintena de iniciativas que contribuirán a dar a coñecer a situación real das migracións e o dereito de acceso á cultura. A presidenta do CCG, Rosario Álvarez; a coordinadora da comisión, Paula Cabaleiro; unha das tres coordinadoras do programa, Encarga Lago; máis a deputada de Cultura na Deputación de Lugo, Iria Castro; abren esta sesión de traballo que é pechada ao público.
12/03/2026

Unha xornada aborda a política cultural local na xornada “Cultura e Concellos”

As políticas culturais municipais son fundamentais para o desenvolvemento da cultura en Galicia. As administracións locais son as máis próximas á cidadanía, manteñen as infraestruturas e programacións básicas e garanten o acceso da cidadanía á cultura. A V xornada “Cultura e concellos” da Comisión Técnica de Xestión e Políticas Culturais do Consello da Cultura Galega (CCG), coordinada por Alberto García, aborda a situación da cultura municipal a través da exposición dunha serie de retos, ferramentas e casos prácticos para coñecer a súa situación a día de hoxe. A presidenta do CCG, Rosario Álvarez; a coordinadora da comisión, Paula Cabaleiro; máis o responsable da sesión, Alberto García, inauguran esta sesión que tamén se seguir en directo desde o web corporativo e a nosa canle de YouTube.
19/02/2026

Un informe demanda o cumprimento dos dereitos culturais de acceso á cultura

O informe “Acceso á cultura en Galicia”, elaborado pola Comisión Técnica de Xestión e Políticas Culturais do Consello da Cultura Galega (CCG), coordinada por Paula Cabaleiro, conclúe que non existe unha percepción social de cumprimento efectivo dos dereitos culturais en Galicia. A presidenta do CCG, Rosario Álvarez, xunto coa coordinadora da sección, Paula Cabaleiro, e a redactora do texto e membro da comisión, Ruth Sousa, presentaron esta mañá o informe nunha rolda de prensa celebrada na sede da institución. “É un informe cunha metodoloxía diferente, que recolle información ao longo de todo un ano e que se sitúa na propia razón de ser da entidade, que ten entre os seus cometidos garantir a cultura”, asegurou Rosario Álvarez. O documento, elaborado tras un proceso no que participaron arredor de 500 persoas de perfil variado, insta as administracións a cumprir a lexislación en materia de accesibilidade, mellorar a formación dos profesionais e fomentar o coñecemento destes dereitos entre a cidadanía.
12/05/2025

Unha xornada afonda nos efectos do capitalismo na saúde e no benestar dos creadores culturais

Remedios Zafra, Iria Veiga e Marga Tojo, tres mulleres fundamentais no pensamento crítico contemporáneo, participarán este martes 13 (a partir das 16:45 horas), na xornada Ansiedade e esperanza na nova cultura. Unha cita organizada pola Comisión técnica temporal de Xestión e Políticas Culturais do Consello da Cultura Galega (CCG) para afondar nos problemas que o sistema actual ocasiona aos profesionais do sector, atendendo principalmente á saúde mental e ao seu benestar. A presidenta do CCG, Rosario Álvarez, a coordinadora da comisión, Paula Cabaleiro, máis a encargara desta cita, Uxía Caride, inauguran este encontro presencial que ten esgotadas as súas prazas. Poderase seguir en directo desde o web do CCG e a súa canle de YouTube.
28/04/2025

Abórdase a importancia da cidade de Santiago en Díaz Pardo nunha xornada

Isaac Díaz Pardo é unha figura central para a cultura galega. Neste ano, recoñecido co Día das Artes Galegas, o Consello da Cultura Galega (CCG) achégase á súa figura este luns 28 de abril (a partir das 16:45 horas) na xornada titulada “Isaac Díaz Pardo. Azul Compostela” na que catro persoas moi vencelladas ao intelectual abordan catro facetas complementarias. A sesión, coordinada por Silvia García e Eduardo Valiña, é presencial pero pode seguirse en directo desde o web da institución e a canle de Youtube.
21/04/2025

Unha xornada analiza desde Allariz a relación entre cultura e territorio

Existen políticas ou proxectos que garantan os dereitos culturais e se adapten ás dinámicas e realidades territoriais? Estes proxectos parten da cidadanía ou das administracións? Son iniciativas exportadas ou as iniciativas culturais nacen do propio territorio e da comunidade rural? Estas son algunhas cuestións que pretende responder a xornada “Acceso á cultura e territorio” que se desenvolve este martes 22 de abril en A Casa Vella (Amiadoso, Allariz). É a segunda cita do ciclo “Acceso á cultura en Galicia 2025”, que puxo en marcha a Comisión Técnica Temporal de Xestión e Políticas Culturais, do Consello da Cultura Galega (CCG). Roberto Pascual coordina esta sesión que obterá datos a partir de experiencias realizadas nas comarcas do interior de Galicia. A xornada ten as prazas cubertas, non se emite en directo pero será gravada e subirase ao sitio web á maior brevidade posible.
25/03/2025

Comeza en Boiro o ciclo “Acceso á cultura en Galicia 2025”

O Consello da Cultura Galega (CCG), da man da Comisión Técnica Temporal de Xestión e Políticas Culturais, inicia en Boiro este mércores 26 de marzo (10:00 horas) o ciclo “Acceso á cultura en Galicia 2025”. Cinco xornadas (catro de recollida e unha de debate final) que se desenvolven entre marzo e xuño e atenden a catro perspectivas do dereito de acceso á cultura. A primeira das citas titúlase “Acceso á cultura e participación” e aborda o dereito a participar da cidadanía. A coordinadora da comisión do CCG, Paula Cabaleiro; o alcalde de Boiro, José Ramón Romero; o coordinador da xornada, Alberto García; máis a deputada provincial de cultura, Natividad González, inauguran esta sesión de traballo na que se exporán seis exemplos de boas prácticas que se están a desenvolver en diferentes lugares. A xornada non se emite en directo pero será gravada e subirase á hemeroteca á maior brevidade posible.
28/02/2024

As emerxentes leis de dereitos culturais analízanse mañá nunha xornada en Padrón

Os dereitos culturais. Un novo paradigma para a cultura que vén é o título da xornada que terá lugar mañá, 29 de febreiro, ás 10:00 horas, na Casa Museo Rosalía de Castro (Padrón). A cita, organizada pola Comisión Técnica Temporal de Xestión e Políticas Culturais do Consello da Cultura Galega (CCG) e coordinada por Alberto de Boiro, ten como obxectivo analizar as últimas leis aprobadas en materia de dereitos culturais. A sesión non se emitirá en directo, pero será gravada e subida posteriormente á hemeroteca do CCG.
08/04/2022

Unha xornada analiza a cultura local na democracia

“Políticas culturais municipais. 40 anos despois” é o título da xornada coa que a Comisión Técnica de Xestión e Políticas Culturais Comisión do Consello da Cultura Galega (CCG) pretende facer balance da cultura a nivel local na democracia. A xornada contará coa presenza de expertos no ámbito municipal e na xestión cultural como Héctor Pose, Carlos Lorenzo ou Claudia Leite, coordinadora da candidatura á Capitalidade Cultural Europea da cidade de Braga. A cita, que se desenvolverá o vindeiro 22 de abril, ten aberta a inscrición.
04/04/2022

Repensar o papel do CGAC entre as conclusións da xornada Situarnos: o poder dos museos

Repensar o papel do Centro Galego de Arte Contemporánea (CGAC), reactivar os procesos de incorporación de persoal aos museos e crear redes de colaboración entre eles son as principais conclusións da xornada “Situarnos: o poder dos museos”, organizada polo Consello da Cultura Galega (CCG) e a Fundación María José Jove (FMJJ). O documento acábase de facer público e expón as ideas abordadas ao fío do encontro que tivo lugar o pasado 4 de febreiro entre Manuel Borja-Villel, director do Museo Nacional Centro de Arte Reina Sofía (MNCARS), e unha parte representativa das institucións museísticas galegas e representantes políticos do eido da cultura, asociacións, artistas e curadores.
14/03/2022

Diferentes expertos reivindican o papel singular das filmotecas

“As filmotecas somos institucións singulares na fronteira entre museos, arquivos e bibliotecas” asegurou Mariona Bruzzo, xefa do Centre de Conservació i Restauració da Filmoteca de Catalunya no marco da xornada "Filmotecas e patrimonio audiovisual” que organizou a Comisión Técnica Temporal de Xestión e Políticas Culturais do Consello da Cultura Galega (CCG). A cita, coordinada por Sergio Lago e Jose Manuel Sande, afondou no papel que debe desenvolver unha filmoteca, centros que traballan co patrimonio audiovisual onde a conservación e a investigación son actividades centrais. Tamén deixaron abertos outros camiños, como a necesidade dunha actuación conxunta arredor da dixitalización.
13/03/2022

Unha xornada reflexiona sobre o papel actual das filmotecas

Que ten que ser unha filmoteca hoxe? Que papel real desempeña? Estas son algunhas das cuestións sobre as que se reflexionará na xornada “Filmotecas e patrimonio audiovisual” que organiza a Comisión Técnica Temporal de Xestión e Políticas Culturais do Consello da Cultura Galega (CCG). Josetxo Cerdán, director da Filmoteca Española, Esteve Riambau, director da Filmoteca de Catalunya, son algúns dos participantes deste encontro coordinado por Sergio Lago e José Manuel Rey Sande no que proxectarán e comentarán filmes históricos restaurados. As prazas están esgotadas pero poderá seguirse en directo a través do web e das redes sociais da institución.
04/02/2022

Unha xornada insta a actualizar e a renovar os museos para achegalos á cidadanía

O Consello da Cultura Galega (CCG) acolleu esta tarde un diálogo entre Manuel Borja-Villel, director do Museo Nacional Reina Sofía (MNRS) e Santiago Olmo, director do Centro Galego de Arte Contemporánea (CGAC). Dous directores de museos que teñen colección propia, que foron postos en marcha na época da transición, aínda que están vencellados a espazos políticos e xeográficos diferentes. Pero aquel contexto é distinto ao actual e, na súa opinión, cómpre unha actualización, unha remodelación deste tipo de centros e que debe estar achegado ao presente pero, sobre todo, á cidadanía. Sobre gobernanza, equipos, públicos e xestión falaron no marco da xornada “Situarnos: o poder dos museos” que organizaron o Consello da Cultura Galega e a Fundación María José Jove.
03/02/2022

O director do Museo Reina Sofía afondará mañá no Consello da Cultura Galega sobre o papel dos museos

Manuel Borja-Villel, director do Museo Nacional Centro de Arte Reina Sofía, e Santiago Olmo, director do Centro Galego de Arte Contemporánea (CGAC) dialogarán mañá (18:00 horas) no Consello da Cultura Galega (CCG) sobre o papel dos museos a día de hoxe e a súa relación coa cidadanía. A xornada chámase “Situarnos: o poder dos museos” e está organizada polo CCG e a Fundación María José Jove (FMJJ). A cita é presencial e tamén se pode seguir en directo a través do web e das redes sociais da institución.
28/01/2022

Unha xornada do Consello da Cultura Galega e a Fundación María José Jove analiza o papel dos museos

Reflexionar sobre o papel que desenvolven os museos á hora de desafiar os retos e as necesidades do século XXI e de construír unha sociedade libre, democrática e culta. Esta é a premisa coa que o Consello da Cultura Galega (CCG) e a Fundación María José Jove (FMJJ) organizan o vindeiro 4 de febreiro a xornada “Situarnos: o poder dos museos”. O encontro pon o foco no modelo concreto do Museo Nacional Centro de Reina Sofía (MNCARS), que explicará o seu director, Manuel Borja Villel. A cita ten dúas partes: unha sesión matutina pechada a profesionais do sector e outra vespertina, aberta ao público, na que Borja Villel dialogará con Santiago Olmo, director do Centro Galego de Arte Contemporánea (CGAC). No web do CCG xa está aberta a inscrición para a sesión de tarde.
17/01/2022

Unha xornada do Consello da Cultura Galega fai balance de 40 anos de políticas culturais

O Consello da Cultura Galega organiza este martes unha xornada que pretende facer balance de corenta anos de políticas culturais. Na xornada, coordinada por Xavier Campos, Marcos Lorenzo e Dolores Vilavedra, participan unha ducia de profesinais de diferentes ámbitos que identificarán as temáticas históricas máis relevantes, as fases principais e os fitos máis significativos das políticas culturais autonómicas neste período. A presidenta do CCG, Rosario Álvarez, inaugura esta cita presencial que tamén se pode seguir en directo polas redes sociais da institución.