Arquivo de noticias do CCG

A Casa de Cultura de Antas de Ulla acolleu este xoves a xornada final do foro “Acceso á cultura en Galicia” que organiza a Comisión Técnica Temporal de Xestión e Políticas Culturais do Consello da Cultura Galega (CCG). Un proceso no que participaron representantes do terceiro sector, profesionais da cultura, cidadanía e responsables políticos. Entre as conclusións desta iniciativa salientouse o papel esencial dos profesionais da cultura como axentes de cambio, a necesidade de mellorar a comunicación institucional —simplificando a linguaxe burocrática e eliminando barreiras simbólicas—, e a urxencia de incorporar á cidadanía e aos colectivos vulnerables na toma de decisións lexislativas e programáticas. A presidenta do CCG, Rosario Álvarez, e a alcaldesa de Antas de Ulla, Pilar García, inauguraron este encontro que foi gravado e se poderá recuperar desde o web institucional.

O Consello da Cultura Galega (CCG) pecha este xoves (9 de outubro, 10:00 horas) na casa da cultura de Antas de Ulla o foro “Acceso á cultura en Galicia 2025”, unha iniciativa promovida pola súa Comisión Técnica Temporal de Xestión e Políticas Culturais que analiza o exercicio real dos dereitos culturais da cidadanía galega. A xornada servirá para presentar os primeiros resultados das recollidas territoriais desenvolvidas no marco deste foro durante a pasada primavera, ademais de xuntar representantes do Ministerio de Cultura e da Xunta de Galicia, que exporán as principais liñas dos novos marcos lexislativos e programáticos nesta materia. A xornada non se emite en directo pero será gravada e incorporase ao web institucional.

O Museo Pazo de Tor, en Monforte, acolle este mércores (a partir das 10:00 horas) a última sesión do ciclo “Acceso á cultura”, co que a Comisión Técnica Temporal de Xestión e Políticas Culturais do Consello da Cultura Galega (CCG) que coordina Paula Cabaleiro, revisa a situación deste dereito en Galicia. Nesta ocasión prestarase atención ao acceso á cultura desde a multiperspectiva da interseccionalidade das desigualdades. Encarna Lago coordina esta cita na que se amosarán diferentes experiencias para amosar como o xénero, a etnia, a clase social, a procedencia, a diversidade funcional, os ciclos de vida ou mesmo o territorio se cruzan e crean barreiras complexas. A xornada non se emite en directo pero será gravada e os vídeos subiranse ao web da institución.

Acceso á cultura e comunicación é o nome da nova xornada do ciclo Acceso á cultura en Galicia 2025, que desenvolve a Comisión Técnica Temporal de Xestión e Políticas Culturais, do Consello da Cultura Galega (CCG) que coordina Paula Cabaleiro. Esta sesión, que terá lugar este mércores 21 de maio (16:00 horas) en Soutomaior, pretende analizar e recoller datos a partir das experiencias de oito proxectos que se desenvolven na provincia de Pontevedra. A sesión está coordinada por Marián Fernández, non se emite en directo pero será gravada e subirase á hemeroteca web do CCG á maior brevidade posible.

Remedios Zafra, Iria Veiga e Marga Tojo, tres mulleres fundamentais no pensamento crítico contemporáneo, participarán este martes 13 (a partir das 16:45 horas), na xornada Ansiedade e esperanza na nova cultura. Unha cita organizada pola Comisión técnica temporal de Xestión e Políticas Culturais do Consello da Cultura Galega (CCG) para afondar nos problemas que o sistema actual ocasiona aos profesionais do sector, atendendo principalmente á saúde mental e ao seu benestar. A presidenta do CCG, Rosario Álvarez, a coordinadora da comisión, Paula Cabaleiro, máis a encargara desta cita, Uxía Caride, inauguran este encontro presencial que ten esgotadas as súas prazas. Poderase seguir en directo desde o web do CCG e a súa canle de YouTube.

A cidade portuguesa de Braga acolle o encontro Jardíns históricos de Galicia e norte de Portugal que organiza o Consello da Cultura Galega (CCG) xunto coa Associação Portuguesa dos Jardíns Históricos (AJH). A cita combina relatorios sobre os xardíns como elementos patrimoniais e ferramentas turísticas, ademais de diferentes visitas a varios espazos catalogados. A presidenta do CCG, Rosario Álvarez; a presidenta da AJH, Teresa Andresen; máis o vicepresidente da Mesa da Confraria do Bom Jesus do Monte, Varico Pereira, inauguraron esta mañá o encontro que conclúe este sábado 3 de maio coas visitas ao Santuário do Bom Jesus do Monte e á Quinta do Souto.

Existen políticas ou proxectos que garantan os dereitos culturais e se adapten ás dinámicas e realidades territoriais? Estes proxectos parten da cidadanía ou das administracións? Son iniciativas exportadas ou as iniciativas culturais nacen do propio territorio e da comunidade rural? Estas son algunhas cuestións que pretende responder a xornada “Acceso á cultura e territorio” que se desenvolve este martes 22 de abril en A Casa Vella (Amiadoso, Allariz). É a segunda cita do ciclo “Acceso á cultura en Galicia 2025”, que puxo en marcha a Comisión Técnica Temporal de Xestión e Políticas Culturais, do Consello da Cultura Galega (CCG). Roberto Pascual coordina esta sesión que obterá datos a partir de experiencias realizadas nas comarcas do interior de Galicia. A xornada ten as prazas cubertas, non se emite en directo pero será gravada e subirase ao sitio web á maior brevidade posible.

O Consello da Cultura Galega (CCG), da man da Comisión Técnica Temporal de Xestión e Políticas Culturais, inicia en Boiro este mércores 26 de marzo (10:00 horas) o ciclo “Acceso á cultura en Galicia 2025”. Cinco xornadas (catro de recollida e unha de debate final) que se desenvolven entre marzo e xuño e atenden a catro perspectivas do dereito de acceso á cultura. A primeira das citas titúlase “Acceso á cultura e participación” e aborda o dereito a participar da cidadanía. A coordinadora da comisión do CCG, Paula Cabaleiro; o alcalde de Boiro, José Ramón Romero; o coordinador da xornada, Alberto García; máis a deputada provincial de cultura, Natividad González, inauguran esta sesión de traballo na que se exporán seis exemplos de boas prácticas que se están a desenvolver en diferentes lugares. A xornada non se emite en directo pero será gravada e subirase á hemeroteca á maior brevidade posible.

Museos en positivo. Creando comunidade é o título da xornada coa que o Consello da Cultura Galega (CCG) e o Consello Galego de Museos reflexionan sobre o papel que os museos desenvolven co territorio e coa comunidade á que pertencen. Na xornada coñeceranse de primeira man experiencias innovadoras que se están a desenvolver na península, como o proxecto Museos Vivos que se realiza en Castela e León, a liña de acción do Institut valencià d´Art Modern (IVAM) en espazos rurais ou o caso de Gordailua, centro de Colecciones Patrimoniales de bienes muebles de Gipuzkoa. A xornada tamén servirá para ver experiencias de museos galegos que tamén exporán os problemas e retos de futuro. A presidenta do CCG, Rosario Álvarez, e Ángeles Penas Truque, membro do Consello Galego de Museos, inauguran esta xornada presencial que se pode seguir en directo desde o web e as redes sociais da institución.

Reflexionar sobre a "inclusión da perspectiva da diversidade sexual e de xénero nas programacións culturais de Galicia e a situación dos profesionais LGBT+" é o obxectivo da quinta xornada "Pensar con orgullo. Culturas e perspectivas queer" que se celebrará este xoves 20 de xullo de 2024 no Consello da Cultura Galega. A xornada está organizada polo Centro de Documentación en Igualdade e Feminismos (CCG) do Consello da Cultura Galega baixo a coordinación de María Fernández Sanjurjo.

Os dereitos culturais. Un novo paradigma para a cultura que vén é o título da xornada que terá lugar mañá, 29 de febreiro, ás 10:00 horas, na Casa Museo Rosalía de Castro (Padrón). A cita, organizada pola Comisión Técnica Temporal de Xestión e Políticas Culturais do Consello da Cultura Galega (CCG) e coordinada por Alberto de Boiro, ten como obxectivo analizar as últimas leis aprobadas en materia de dereitos culturais. A sesión non se emitirá en directo, pero será gravada e subida posteriormente á hemeroteca do CCG.

Julia Minguillón foi unha das grandes pintoras da posguerra e unha das poucas artistas galegas que transcenderon a nivel nacional. Porén, malia contar cunha traxectoria detacada, cunha técnica brillante e unha paleta e estilo moi persoais aínda permanece descoñecida para o gran público. Co fin de divulgar a súa figura, a Sección de Creación e Artes Visuais Contemporáneas do Consello da Cultura Galega (CCG) dedícalle mañá, 28 de setembro, unha xornada do ciclo Revisando a nosa arte, que regresa despois do verán. A sesión é presencial e pode seguirse en directo a través do sitio web e as redes sociais da institución.

O Consello da Cultura Galega (CCG) organiza mañá a súa sede a xornada “Políticas culturais municipais. 40 anos despois”. Unha cita que pretende facer unha análise da cultura nos concellos galegos durante a democracia desde un punto de vista teórico, pero tamén coa visibilización de experiencias coma as de Carral, Pontevedra ou Carballo. Ademais, Claudia Leite, que formou parte das coordinadoras das candidaturas á Capitalidade Cultural Europea da cidade de Braga e de Guimaraes, explicará as claves na tramitacións deste tipo de iniciativas. A cita é presencial, pero pode seguirse en directo a través das redes sociais do CCG.

“Políticas culturais municipais. 40 anos despois” é o título da xornada coa que a Comisión Técnica de Xestión e Políticas Culturais Comisión do Consello da Cultura Galega (CCG) pretende facer balance da cultura a nivel local na democracia. A xornada contará coa presenza de expertos no ámbito municipal e na xestión cultural como Héctor Pose, Carlos Lorenzo ou Claudia Leite, coordinadora da candidatura á Capitalidade Cultural Europea da cidade de Braga. A cita, que se desenvolverá o vindeiro 22 de abril, ten aberta a inscrición.

Repensar o papel do Centro Galego de Arte Contemporánea (CGAC), reactivar os procesos de incorporación de persoal aos museos e crear redes de colaboración entre eles son as principais conclusións da xornada “Situarnos: o poder dos museos”, organizada polo Consello da Cultura Galega (CCG) e a Fundación María José Jove (FMJJ). O documento acábase de facer público e expón as ideas abordadas ao fío do encontro que tivo lugar o pasado 4 de febreiro entre Manuel Borja-Villel, director do Museo Nacional Centro de Arte Reina Sofía (MNCARS), e unha parte representativa das institucións museísticas galegas e representantes políticos do eido da cultura, asociacións, artistas e curadores.

A Sección de Patrimonio e Bens Culturais do Consello da Cultura Galega (CCG) inicia este ano 2022 as xornadas dos Encontros Monográficos co Patrimonio Cultural no CIN Bretoña, un centro de interpretación localizado no concello da Pastoriza (Lugo) que conta cunha exposición centrada na arqueoloxía, historia e etnografía do concello, pero que pon a mirada tamén no patrimonio natural, a través dunha serie de rutas polos arredores, así como nos protagonistas que construíron a historia de Bretoña. Rosario Álvarez, presidenta do CCG ; José Tomé Roca, presidente da Deputación Provincial de Lugo; Primitivo Iglesias Sierra, alcalde da Pastoriza; Rebeca Blanco-Rotea, coordinadora da Sección de Patrimonio e Bens Culturais do CCG e María Xosé Porteiro García, coordinadora do Centro de Documentación en Igualdade e Feminismos do CCG, son os encargados de inaugurar esta cita na Pastoriza (venres, 16:30horas). A xornada vai ser gravada para poñer a disposición da cidadanía as achegas do encontro á maior brevidade posible.

Manuel Borja-Villel, director do Museo Nacional Centro de Arte Reina Sofía, e Santiago Olmo, director do Centro Galego de Arte Contemporánea (CGAC) dialogarán mañá (18:00 horas) no Consello da Cultura Galega (CCG) sobre o papel dos museos a día de hoxe e a súa relación coa cidadanía. A xornada chámase “Situarnos: o poder dos museos” e está organizada polo CCG e a Fundación María José Jove (FMJJ). A cita é presencial e tamén se pode seguir en directo a través do web e das redes sociais da institución.

Reflexionar sobre o papel que desenvolven os museos á hora de desafiar os retos e as necesidades do século XXI e de construír unha sociedade libre, democrática e culta. Esta é a premisa coa que o Consello da Cultura Galega (CCG) e a Fundación María José Jove (FMJJ) organizan o vindeiro 4 de febreiro a xornada “Situarnos: o poder dos museos”. O encontro pon o foco no modelo concreto do Museo Nacional Centro de Reina Sofía (MNCARS), que explicará o seu director, Manuel Borja Villel. A cita ten dúas partes: unha sesión matutina pechada a profesionais do sector e outra vespertina, aberta ao público, na que Borja Villel dialogará con Santiago Olmo, director do Centro Galego de Arte Contemporánea (CGAC). No web do CCG xa está aberta a inscrición para a sesión de tarde.

O Consello da Cultura Galega (CCG) acolleu esta tarde unha xornada que visibilizou diferentes proxectos artísticos que amosan como a arte pode ser un medio e ferramenta de transformación social. Creadores e xestores amosaron proxectos que se desenvolven desde a Ribeira Sacra, África, Gondomar, León e que permiten ver que a arte tamén pode ser un motor de transformación económica e social concibida desde a sustentabilidade. A presidenta do CCG, Rosario Álvarez; o coordinador da Sección de Creación e Artes Visuais Contemporáneas, Manuel Quintana Martelo, e a coordinadora da xornada Paula Cabaleiro, inauguraron esta cita titulada “Da emerxencia(creativa)”, que foi gravada e se porá a disposición da cidadanía no web da institución.

¿Que papel pode xogar a arte na procura dun cambio social cara un desenvolvemento sustentable e igualitario do mundo? Sobre esta pregunta falarán artistas e críticos na xornada “Da emerxencia (creativa)” que organiza a Sección de Creación e Artes Visuais Contemporáneas do Consello da Cultura Galega (CCG). Paula Cabaleiro coordina esta cita na que participan Fernando Casás, Ruth Montiel Arias, Pamen Pereira, Carlos Quintáns, Encarna Lago e Luís Martínez Santos. A xornada, que acaba de abrir a inscrición, é presencial pero pode seguirse en directo a través do web do CCG e as súas redes sociais.