Arquivo de noticias do CCG

“Papés d’emprenta condenada” foi como Manuel Freire Castrillón cualificou en 1813 “Os rogos d’un gallego”, a célebre denuncia da Inquisición escrita por Manuel Pardo de Andrade. Puña así de relevo o papel decisivo que a prensa e os impresos —xunto coa circulación manuscrita— tiveron nos albores do século XIX como vehículos de transmisión de ideas, noticias e debates políticos nun tempo de profunda transformación social. É tamén o título do proxecto web que presentaron esta mañá na sede da institución a presidenta do Consello da Cultura Galega, Rosario Álvarez; o editor dos textos, Ramón Mariño; o coordinador da unidade de divulgación e contidos dixitais do CCG, Manuel Gago. A iniciativa recupera, edita e analiza un centenar de textos galegos producidos entre 1797 e 1846.

A Rianxeira, Lela e outras cancións populares resoaron nas voces do medio milleiro de nenos e nenas que, por mor da chuvia, tiveron que desprazarse ao pavillón municipal Jose Abuín “Chema” de Rianxo na novena edición de No bico un cantar. “Esta é unha actividade pensada para a rapazada, auténticos protagonistas, para que sexa unha experiencia rica e inesquecible”, apuntou a presidenta do Consello da Cultura Galega (CCG), Rosario Álvarez, no inicio desta actividade que o CCG organiza xunto coas consellerías de Educación, Ciencia, Universidades e Formación Profesional e de Cultura, Lingua e Xuventude da Xunta de Galicia mais a colaboración do Concello de Rianxo. O conselleiro de Cultura, José López Campos, destacou que a iniciativa “leva tempo poñendo en valor aos persoeiros da nosa cultura entre a mocidade e que, como non podía ser doutro xeito, este ano é especial ao sumarse á celebración do Ano Castelao”. Maximino Zumalave dirixiu este gran coro acompañado da formación de metais Hércules Brass con Rosa Aneiros como mantedora. Ademais, anunciouse que a vindeira edición terá lugar en Vilalba cos poetas da Terra Chá como protagonistas.

500 nenos e nenas de toda Galicia, aos que se lle suma a colaboración especial do Instituto Arxentino Galego Santiago Apóstol de Bos Aires, participarán este venres en Rianxo na novena edición de No bico un cantar. O proxecto pon música á tradición literaria galega e está organizado polo Consello da Cultura Galega coas consellerías de Educación, Ciencia, Universidades e Formación Profesional e de Cultura, Lingua e Xuventude da Xunta de Galicia máis a colaboración do concello de Rianxo. O concerto terá lugar ás 18:00 horas na praza Rafael Dieste (en caso de chuvia trasladarase ao pavillón municipal, José M. Abuin "Chema"). O 75º aniversario do pasamento de Afonso Daniel Rodríguez Castelao centra o programa desta edición na que destaca a estrea absoluta de Daniel, peza composta para a ocasión por José Luís do Pico Orjais con arranxos musicais de Juan Durán.

O 75º aniversario do pasamento de Afonso Daniel Rodríguez Castelao centra a nova edición de No bico un cantar, unha actividade organizada polo Consello da Cultura Galega (CCG) que pon música á tradición literaria galega para divulgala entre o alumnado dos conservatorios e centros de ensino musical de toda Galicia. 500 nenos e nenas, coa novidade da colaboración especial do Instituto Arxentino Galego Santiago Apóstol de Bos Aires, participarán neste encontro, que terá lugar na praza de Rafael Dieste o vindeiro 6 de xuño (18:00 horas). A presidenta do CCG, Rosario Álvarez, destacou na rolda de prensa de presentación do concerto que “é unha das actividades máis emocionantes do noso calendario que este ano cumpre nove edicións presenciais”. O alcalde, Julián Bustelo, agradeceu a elección de Rianxo para homenaxear a Castelao “nun ano especialmente significativo”. O director xeral de Cultura, Anxo Lorenzo, incidiu “no traballo previo de varios meses que remata nunha xornada de convivencia”. Na rolda tamén estaban o subdirector xeral de Aprendizaxe Permanente, Ensinanzas Artísticas, Idiomas e Deportivas, Rubén Vázquez, máis o director do concerto, Maximino Zumalave, quen destacou o repertorio popular no que haberá a estrea absoluta de Daniel, peza composta para a ocasión por José Luís do Pico Orjais, con arranxos musicais de Juan Durán.

O Consello da Cultura Galega (CCG) colaborou coa consellería de Sanidade no marco da actividade organzada co gallo do Día Mundial para a prevención do suicidio. No marco desta actividade tivo lugar unha lectura contemorativa a cargo da escritora Rosa Aneiros.

As palabras de Otero Pedrayo, Risco e Álvaro de las Casas resoaron nas voces dos trescentos cincuenta nenos e nenas que encheron o Castelo de Ribadavia na oitava edición de No bico un cantar. “Esta é unha actividade moi querida por nós. Programámola pensando nas nenas e nenos que son os protagonistas do día, para que sexa unha experiencia rica e inesquecible”, apuntou a presidenta do Consello da Cultura Galega (CCG), Rosario Álvarez, no inicio desta actividade que a institución organiza xunto coas consellerías de Educación, Ciencia, Universidades e Formación Profesional e de Cultura, Lingua e Xuventude da Xunta de Galicia e mais coa colaboración do Concello de Ribadavia. O conselleiro de Cultura, José López Campos, destacou que este concerto, que pecha unha xornada de convivencia e o traballo de todo un ano, “adobía con acerto música, lecer e patrimonio”. Maximino Zumalave dirixiu este gran coro acompañado da formación de metais Hércules Brass. Ademais, anunciouse que a vindeira edición terá lugar en Rianxo con Castelao como protagonista, cando se fan 75 anos do seu pasamento.

Máis de trescentos cincuenta nenos e nenas participan este venres na oitava edición de No bico un cantar. Unha cita que xunta música, literatura e mocidade nun encontro que arrinca pola mañá, coa chegada do alumando procedente dos conservatorios de música profesional de Galicia xunto coas escolas de música da zona, e remata co concerto (18:00 horas) no Auditorio Rubén García do Castelo de Ribadavia. Maximino Zumalave dirixe esta actuación organizada polo Consello da Cultura Galega (CCG), as consellerías de Educación, Ciencia, Universidades e Formación Profesional e a de Cultura, Lingua e Xuventude da Xunta de Galicia, coa colaboración do Concello de Ribadavia. A escritora Rosa Aneiros é a mantedora deste acto ao que asiste a presidenta do CCG, Rosario Álvarez; o Conselleiro de Cultura, José López Campos; e o alcalde de Ribadavia, César Fernández. No programa destaca a estrea absoluta de Vos nova, peza composta para a ocasión por Aaron Siebert sobre texto de Otero Pedrayo.

O centenario da publicación do primeiro número de Nós, voceiro da histórica entidade, centra o programa da oitava edición de No bico un cantar, unha actividade organizada polo Consello da Cultura Galega (CCG) que pon música á tradición literaria galega para divulgala entre o alumnado dos conservatorios e centros de ensino musical de toda Galicia. Máis de trescentos cincuenta nenos e nenas participarán neste encontro, que terá lugar no Auditorio Rubén García do Castelo de Ribadavia o vindeiro 31 de maio (18:00 horas). A presidenta do CCG, Rosario Álvarez, destacou na presentación “a recuperación deste proxecto que se tivo que suspender por mor da pandemia, que xunta música, literatura e mocidade e co que contribuímos a crear un corpus musical coa encarga dunha composición, que nesta ocasión recae en Aaron Siebert e leva por título Vos nova sobre texto de Otero Pedrayo”. O director xeral de Cultura, Anxo Lorenzo e o subdirector xeral de Aprendizaxe Permanente, Ensinanzas Artísticas, Idiomas e Deportivas, Rubén Vázquez destacaron na rolda os traballos de preparación previos levados a cabo desde os conservatorios, mentes que o alcalde de Ribadavia, César Fernández, agradeceu a escolla desta localidade para lembrar a Xeración Nós. Maximino Zumalave, director do concerto destacou que “a música sempre se asocia aos días de festa, e precisamente isto é o que imos desenvolver este venres, unha gran festa que xunta a mocidade cantando na nosa lingua coa nosa música”.

O Consello da Cultura Galega presentou esta mañá o volume Papés d'emprenta condenada (III). Novos textos, reflexións finais, co que a institución pecha un ciclo de vinte e cinco anos en que se foron editando os textos, impresos e manuscritos cos que a lingua galega entrou no século XIX durante o prerrexurdimento. Os tres volumes editados supuxeron a incorporación de 69 novos textos en lingua con respecto aos que se coñecían a finais da década de 1980. Na presentación estiveron Rosario Álvarez, presidenta do Consello da Cultura Galega; Xosé López García, catedrático de Xornalismo da USC e promotor da colección Papés d'emprenta condenada, e os autores da publicación, Ramón Mariño Paz, catedrático de Filoloxía da USC, e Damián Suárez Vázquez, profesor de ensino secundario. A presentación coincide coa celebración o 7 de febreiro do Día dos Medios en Galego.

O Consello da Cultura Galega (CCG) acolleu na mañá deste venres, 7 de xullo, o acto institucional co que celebrou o 40º aniversario da súa creación. “Renovamos o compromiso do CCG coa defensa e promoción dos valores culturais do pobo galego, dos seus dereitos á cultura, do seu dereito e obriga de arrequentar e transmitir a herdanza cultural”, expresou a presidenta, Rosario Álvarez, nun discurso en que fixo partícipes a todos os presentes. “Velaí un camiño que, por forza, temos que percorrer xuntos”, afirmou nun acto que tamén contou coa presenza de Alfonso Rueda, presidente da Xunta de Galicia e presidente de honra da institución. Rueda puxo en valor o traballo desenvolvido polo CCG durante todos estes anos e comprometeu "o apoio do Executivo autonómico a seguir impulsando a creación e o talento galegos". Pola súa parte, o presidente do Parlamento de Galicia, Miguel Ángel Santalices, apuntou que o CCG é unha “institución indispensable para o presente e para o futuro de Galicia”. Autoridades e representantes da cultura galega e da sociedade civil ateigaron a sede da institución nesta celebración.

Un gran ciclo de oito sesións no que participarán figuras como Remedios Zafra, José Luis Villacañas, Peter Kraus ou Josep Ramoneda; visibilización do fondo propio; apertura da institución á cidadanía e dous grandes actos conmemorativos son algunhas das actividades previstas para celebrar o 40 aniversario do Consello da Cultura Galega (CCG). “Queríamos que tivese un carácter festivo, pero tamén que convidase a unha reflexión sobre o papel da cultura e das institucións culturais”, explicou a presidenta, Rosario Álvarez, na presentación da programación. Xosé Manoel Núñez Seixas, vicepresidente e coordinador da comisión que deseñou a celebración da efeméride, insistiu no interese de “fomentar o debate”. As actividades foron ratificadas na sesión plenaria celebrada no serán deste xoves, que contou coa presenza do presidente de honra da institución, o presidente da Xunta de Galicia, Alfonso Rueda Valenzuela.

O Consello da Cultura Galega desenvolveu unha sesión plenaria no serán deste xoves na que aprobou o plan de actividades para 2023. A celebración do corenta aniversario, a internacionalización da cultura galega e a acción exterior centrarán un ano en que a institución continuará coa súa actividade habitual de investigación, documentación, arquivo e asesoría. Entre as actividades previstas para o vindeiro ano destaca o foro Pensar o mundo desde Galicia, no que destacadas personalidades reflexionarán sobre sete temas, entre eles a intelixencia artificial, as sociedades multiculturais ou unha revisión dos modelos para unha economía de cultura. Ademais, incorporouse ao pleno Xesús Palmou, en representación da Real Academia Galega de Xurisprudencia.

A presidenta do Consello da Cultura Galega (CCG), Rosario Álvarez, compareceu na mañá deste mércores na Comisión terceira de Economía, Facenda e Orzamentos, do Parlamento de Galicia, no marco das sesións informativas en relación co Proxecto de lei de orzamentos. O orzamento da institución para o próximo ano é de 3 075 773 euros, 233 373 euros máis que en 2022. É un incremento dun 8,21 % con respecto do último ano. Álvarez rendeu contas da actividade desenvolvida este ano e avanzou a programación para o 2023, que estará centrada, aínda que de xeito non exclusivo, na actividade de celebración do seu 40 aniversario. Alén da actividade habitual de investigación, documentación e arquivo, no vindeiro ano poñerase especial atención a promover a internacionalización da cultura galega, reforzar a acción exterior e promover debates que axuden a pensar o mundo desde Galicia. Os representantes dos distintos grupos parlamentarios expresaron na comparecencia o recoñecemento ao labor que desenvolve a institución.

Hoxe cúmprense 60 anos do pasamento de Julio Camba (Vilanova de Arousa, 1884-Madrid, 1962). Co gallo da efeméride preséntase na Casa de Galicia en Madrid, o documental “O principio do mundo de Julio Camba” que Aser Álvarez elaborou para o Consello da Cultura Galega (CCG). O filme documenta a etapa inicial do reputado escritor e xornalista. Tamén se pode verse tamén nun especial elaborado polo CCG que inclúe a súa entrada no Álbum de Galicia. O audiovisual chega a Madrid, logo de proxectarse o xoves pasado en Vilanova de Arousa, localidade de nacemento do escritor.

O Auditorio de Goián en Tomiño, acollerá esta tarde (19:00 horas), a Gala de presentación do proxecto Meniños Cantores 2, un libro-USB que dezasete centros educativos de Galicia e de Portugal apadriñados ou madriñados por outros tantos artistas que cantan a tradición musical transfronteiriza galego-portuguesa. Á gala asiste Rosario Álvarez, presidenta do Consello da Cultura Galega (CCG) institución que coeditou este proxecto xunto coa asociación Ponte... nas Ondas! (PNO!).

Dezasete centros educativos de Galicia e de Portugal apadriñados ou madriñados por outros tantos artistas conforman Meniños cantores 2 o libro disco que o Consello da Cultura Galega (CCG) e a asociación Ponte... nas Ondas! (PNO!) presentaron esta mañá en Santiago. É unha parte dun proxecto moito máis amplo que conta cunha serie documental, un espazo web e no que tamén se recolle o léxico transfronteirizo desta zona. O proxecto foi presentado esta mañá en rolda de prensa por Rosario Álvarez, presidenta do Consello da Cultura Galega; Rosa Vilas, adxunta á dirección xeral da CRTVG; Cecilia Pereira, comisaria do Xacobeo; Santiago Veloso, presidente de PNO!; Segundo Grandío, produtor do documental e do aspecto musical; e Fernando Abreu, profesor, músico e padriño dun dos centros participantes nesta iniciativa.

“Falamos sempre da pegada de Galicia da II Guerra Mundial pero se cadra é tan ou máis importante a que o conflito deixa en Galicia” asegura Luis Domínguez, coordinador da xornada “Galicia e a II Guerra Mundial”. Esta cita, organizada polo Consello da Cultura Galega, conclúe hoxe cun debate en directo ás 18:30 horas pero todos os relatorios xa se poden consultar desde o web da institución. O coordinador considera que este encontro “puxo de manifesto que o que aconteceu coa II Guerra Mundial foi unha proba de que non estivemos á marxe e, parafraseando aos galeguistas da preguerra, Galicia é unha cédula de universalidade que estivo e está conectada coas correntes europeas”.

Presumiu de ser o único galego ao que lle saíu de balde a viaxe de ida e volta ás Américas, a onde chegou como polisón e foi expulsado polo seu espírito rebelde e revolucionario. O xornalista Julio Camba (1884-1962) foi un dos mellores escritores de prensa da literatura hispana. Este domingo, 28 de febreiro, cando se cumpren anos do seu pasamento, o Consello da Cultura Galega (CCG) presenta “O principio do mundo de Julio Camba”, un documental centrado na súa etapa inicial, e incorpora a súa entrada no Álbum de Galicia.

O Teatro Jofre de Ferrol acolleu esta tarde un acto de homenaxe a Ricardo Carballo Calero. Unha cita organizada polo Consello da Cultura Galega (CCG) que serviu para amosar a faceta polifacética e creadora do autor homenaxeado este ano co Día das Letras Galegas. A presidenta do CCG, Rosario Álvarez destacou na súa intervención que “presentamos dúas pezas que, en dous contextos distintos, evocan a cidade de Ferrol”. No acto tivo lugar a presentación da publicación institucional “Farsa das zocas” coa que a institución recuperou esta obra teatral de Carballo Calero, acompañada dun estudo introdutorio de Carlos Biscainho. Rematou co concerto “Ferrol 1916” no que se estreou a peza que o compositor Miguel Brotóns realizou a partir dun poema homónimo de Carballo.

“Hai un vínculo que nos une dunha maneira especial coa Habana” indicou a presidenta do Consello da Cultura Galega, Rosario Álvarez, na inauguración do congreso “A Habana galega: Historia e memorias cruzadas”. A primeira sesión serviu para coñecer a historia galega desta cidade e a pegada cubana na nosa literatura. A cita continúa este venres 8 coa análise dos movementos migratorios entre ambos territorios e as influencias culturais mutuas da man de Pilar Cagiao, Xosé Manoel Núñez Seixas, Cira Romero ou Luis Toledo Sande. Como complemento do congreso, no serán deste xoves inaugurouse no Museo do Pobo a mostra “O soño cubano da emigración galega” (aberta ata o 22 de decembro) que recupera a fortaleza, continuidade e visibilidade da presenza galega na capital cubana. Ademais, o Auditorio de Galicia acolleu o concerto “Foliada Habaneira” a cargo de Alejandro Vargas Trío e Rosa Cedrón.