Arquivo de noticias do CCG

Ramón Otero Pedrayo (Ourense, 1888–1976) foi profesor, ensaísta, novelista, xeógrafo e xornalista, e unha das figuras máis completas e influentes da cultura galega. No marco do “Ano Oteriano”, que celebra o 50 cabodano, o Consello da Cultura Galega (CCG) acaba de abrir no seu sitio web un espazo que concentra todos os recursos elaborados pola institución ao fío do patriarca das letras galegas. Discursos, epístolas, publicacións, gravacións sonoras, especiais, a entrada biográfica e outros fondos documentais (artigos, manuscritos, etc.) compoñen este espazo que estará en permanente actualización. Con Otero Pedrayo ábrese unha nova forma de acceso aos contidos do CCG a través dos seus protagonistas.

“Castelao foi artista, intelectual e político, e esa tripla mirada dálle unha capacidade rara de xuntar emoción cívica, criterio moral e deseño institucional” afirmou Paulo Carlos López, coordinador da xornada “Castelao: democracia e paz” que o Consello da Cultura Galega (CCG) organizou na mañá deste martes xunto co Equipo de Investigacións Políticas da Universidade de Santiago de Compostela. A vicepresidenta do CCG, Dolores Vilavedra, inaugurou a sesión que puxo en diálogo os textos do intelectual coas intervencións de Serxio María Rodríguez, Tamara Andrés Padín e Iria Friné Rivera que conectaron o seu pensamento co contexto internacional actual.

“Do conto popular e as súas reescrituras. Vicente Risco no xerme da literatura infantil galega” é o título co que o Consello da Cultura Galega (CCG) e a Fundación Vicente Risco pretenden poñer en valor a relevancia da obra de Risco na conservación, reinterpretación e proxección da tradición oral galega ademais de afondar no seu papel na xénese da literatura infantil e xuvenil do país. A cita, que se desenvolve este sábado en Allariz (8 de novembro, 10:00 horas) non se emite en directo pero será gravada o material subirase ao web do CCG.

Son 231 cartas recibidas polo premio Nobel, Camilo José Cela, con boa parte dos autores máis significados da cultura do país na segunda metade do século XX. A dixitalización e posta a disposición pública do fondo destas cartas presentouse este martes na sede da Fundación Pública Camilo José Cela. A presidenta do Consello da Cultura Galega (CCG), Rosario Álvarez, salientou a “ampla e tupida rede de relacións de diverso tipo que mantivo coa sociedade galega, tanto no tecido da intelectualidade galeguista e académica en sentido máis amplo, coma noutros ámbitos”. Mentres que o director xeral de Cultura da Xunta de Galicia, Anxo Lorenzo, destacou que permitirá “coñecer máis de cerca o sentimento de galeguidade do Premio Nobel”. Pola súa parte, Covadonga Rodríguez, directora-xerente da fundación que custodia o legado do autor, lembrou que se trata dunha primeira fase do inxente fondo epistolar que se conserva. As cartas xa están dispoñibles para consulta desde o sitio web do CCG.

O xornal El emigrado, editado pola Sociedad Hijos del Ayuntamiento de la Estrada en Cuba, xa forma parte do Repertorio da prensa da emigración galega, unha iniciativa do Arquivo da Emigración Galega (AEG) dependente do Consello da Cultura Galega (CCG). Nesta ocasión súbense 57 exemplares editados entre 1923 e 1924. Nas súas páxinas colaboraron persoeiros como Wenceslao Fernández Flórez, Vicente Risco, Ramón Otero Pedrayo, Antón Villar Ponte, Antón Losada Diéguez, Basilio Álvarez ou Enrique Labarta Pose.

Xosé María Díaz Castro (Os Vilares, Guitiriz, 1914 – Lugo, 1990) foi un poeta e tradutor autor, entre outras obras en galego, de Nimbos (1961) e Nascida d’un soño (1947). Este persoeiro foi tamén tradutor ao castelán de autores como Rimbaud, Chesterton, Eliot, Whitman e Schiller. Cando se cumpren 34 anos do seu pasamento, a súa entrada incorpórase ao Álbum de Galicia, colección de biografías de figuras destacadas de Galicia promovido polo Consello da Cultura Galega (CCG). O autor do seu texto biográfico é o crítico literario e investigador Armando Requeixo.

Literatura, historia e música terán lugar mañá en Allariz, sábado 28 (10:00 horas) na xornada “A música ten ondas coma o mar”, organizada polo Consello da Cultura Galega (CCG) e a Fundación Vicente Risco Vicente Risco. Unha cita que versará sobre o legado musical do autor e a da súa dona, María del Carmen Fernández Gómez. A xornada non se emite en directo, pero será gravada para logo subirse a hemeroteca web do CCG. Samuel Diz e Xosé Rodríguez son coordinadores desta xornada que inaugura a presidenta do CCG, Rosario Álvarez; a presidenta da Fundación Risco, Celia Pereira; a alcaldesa do Concello de Allariz, Cristina Cid Fernández, e a directora do Teatro Principal de Ourense, Olga Mojón Costela.

O Consello da Cultura Galega lamenta a morte do historiador Justo G. Beramendi, sucedida a pasada madrugada en Santiago de Compostela de xeito repentino. Justo G. Beramendi foi catedrático de Historia Contemporánea da Universidade de Santiago de Compostela e é unha das figuras referenciais para comprender, desde o punto de vista histórico, a articulación do galeguismo político entre os séculos XIX e XX. De feito, o seu libro De provincia a nación. Historia do Galeguismo político recibira o Premio Nacional de Ensaio en 2008. As súas publicacións ofrecen un marco amplo para comprender as dinámicas sociais, xeracionais, políticas nas que se insertaron movementos, partidos políticos e figuras relevantes da historia e cultura galegas.

Máis de trescentos cincuenta nenos e nenas participan este venres na oitava edición de No bico un cantar. Unha cita que xunta música, literatura e mocidade nun encontro que arrinca pola mañá, coa chegada do alumando procedente dos conservatorios de música profesional de Galicia xunto coas escolas de música da zona, e remata co concerto (18:00 horas) no Auditorio Rubén García do Castelo de Ribadavia. Maximino Zumalave dirixe esta actuación organizada polo Consello da Cultura Galega (CCG), as consellerías de Educación, Ciencia, Universidades e Formación Profesional e a de Cultura, Lingua e Xuventude da Xunta de Galicia, coa colaboración do Concello de Ribadavia. A escritora Rosa Aneiros é a mantedora deste acto ao que asiste a presidenta do CCG, Rosario Álvarez; o Conselleiro de Cultura, José López Campos; e o alcalde de Ribadavia, César Fernández. No programa destaca a estrea absoluta de Vos nova, peza composta para a ocasión por Aaron Siebert sobre texto de Otero Pedrayo.

O centenario da publicación do primeiro número de Nós, voceiro da histórica entidade, centra o programa da oitava edición de No bico un cantar, unha actividade organizada polo Consello da Cultura Galega (CCG) que pon música á tradición literaria galega para divulgala entre o alumnado dos conservatorios e centros de ensino musical de toda Galicia. Máis de trescentos cincuenta nenos e nenas participarán neste encontro, que terá lugar no Auditorio Rubén García do Castelo de Ribadavia o vindeiro 31 de maio (18:00 horas). A presidenta do CCG, Rosario Álvarez, destacou na presentación “a recuperación deste proxecto que se tivo que suspender por mor da pandemia, que xunta música, literatura e mocidade e co que contribuímos a crear un corpus musical coa encarga dunha composición, que nesta ocasión recae en Aaron Siebert e leva por título Vos nova sobre texto de Otero Pedrayo”. O director xeral de Cultura, Anxo Lorenzo e o subdirector xeral de Aprendizaxe Permanente, Ensinanzas Artísticas, Idiomas e Deportivas, Rubén Vázquez destacaron na rolda os traballos de preparación previos levados a cabo desde os conservatorios, mentes que o alcalde de Ribadavia, César Fernández, agradeceu a escolla desta localidade para lembrar a Xeración Nós. Maximino Zumalave, director do concerto destacou que “a música sempre se asocia aos días de festa, e precisamente isto é o que imos desenvolver este venres, unha gran festa que xunta a mocidade cantando na nosa lingua coa nosa música”.

Blanca Jiménez Alonso (Ribadeo, 1926 – A Coruña, 2012) destacou polo seu labor a prol do patrimonio bibliográfico e documental galego, un compromiso que se traduciu na procura e achega de fondos para a biblioteca da Fundación Penzol. Posta en marcha grazas á doazón do seu marido, Fermín Penzol, traballou activamente para a institución, da que foi presidenta e presidenta de honra. Ademais, integrou o Plenario do Consello da Cultura Galega (CCG) como membro representativo da Fundación Penzol entre os anos 2002 e 2008. A súa entrada no Álbum de Galicia, a colección dixital de biografías que mantén o CCG, é da autoría de María Dolores Cabrera Iglesias e Patricia Arias Chachero.

Xosé Conde Corbal (Pontevedra, 1923 – Vilagarcía, 1999) foi un destacado debuxante e pintor cunha fecunda traxectoria, entre a que se contan máis de 1700 gravados e outras tantas pinturas. Acadou unha gran sona grazas á serie de carteis que realizou en homenaxe aos intelectuais da xeración Nós, aínda que sobresaíu tamén cunha produción artística na que captou o urbanismo tradicional das cidades e o mundo da natureza. Foi “o pintor das esencias da terra”, subliña Afonso Vázquez-Monxardín. El é o autor da entrada que se incorpora hoxe ao Álbum de Galicia, a colección dixital de biografías que mantén o Consello da Cultura Galega (CCG).

A Casa de Galicia de Montevideo constituíuse como unha asociación integrada pola colectividade galega residente na capital do Uruguai. Ao longo da súa existencia editou diferentes cabeceiras, coas que buscaba informar sobre a vida societaria e divulgar a cultura galega alén mar. Alma Gallega foi o seu voceiro oficial de 1919 a 1927 e, posteriormente, de 1935 a 1967, tivo unha segunda época. A partir deste ano, a entidade publicou de xeito puntual algúns números para conmemorar os seus aniversarios fundacionais e en 1991 comezou a editar un novo voceiro baixo o nome Casa de Galicia. O Repertorio da prensa da emigración galega, proxecto que mantén o Arquivo da Emigración Galega (AEG) do Consello da Cultura Galega (CCG), incorpora neste mes de febreiro varios exemplares destas publicacións. En concreto, súmanse dous números da primeira época de Alma Gallega e seis da segunda, dous exemplares conmemorativos do cincuenta e noventa aniversario da entidade e o primeiro número de Casa de Galicia.

Reflexionar sobre o papel que tiveron as cercas na conformación urbanística do medievo é o obxectivo da xornada “Nas vilas cercadas da Idade Media: protección, control e poder”. A cita, organizada polo Consello da Cultura Galega (CCG) e o Museo Terra de Melide, este luns, 4 de decembro (16:00 horas), no Centro Sociocultural Mingos de Pita (Melide). Na súa inauguración participará Rosario Álvarez, presidenta do CCG, xunto con Xosé Manuel Broz e Cristina Vázquez Neira, do Museo da Terra de Melide. A sesión non se poderá seguir en directo, pero será gravada e subida posteriormente á hemeroteca do Consello da Cultura Galega.

O Concello de Allariz ofreceu este sábado, 30 de setembro, unha recepción oficial ao Consello da Cultura Galega (CCG) e á Fundación Vicente Risco(FVR), con motivo do 40º aniversario da creación do órgano estatutario da nosa cultura e o centenario do Seminario de Estudos Galegos (SEG). NO acto participaron a presidenta do CCG, Rosario ÁLvarez; a alcaldesa, Cristina Cid, e as presidenta da Fundación Vicente Risco, Celia Pereira. O concello realizou este acto a coincidir coa xornada que o CCG e a FVR organizaron na vila alaricana dedicada ao teatro galego.

Desde a publicación de O Bufón d’el Rei pasaron case cen anos. Un período temporal que o Consello da Cultura Galega (CCG) e a Fundación Vicente Risco analizan este sábado 30 de setembro en Allariz na xornada “Do Bufón d’el Rei ata O porco de pé. Teatro galego en perspectiva”. Nela abórdase o teatro galego desde o punto de vista da escena e busca analizar desde o esforzo da xente do Grupo Nós por crear un teatro galego en galego para normalizar a cultura do país (Risco, Castelao, Otero, Cabanillas…), ata as vizosas fontes de creación actual así como a súa proxección cara ao futuro. A xornada está coordinada por Nate Borrajo e Xosé Rodríguez Díaz.

De Rosalía de Castro ata Emma Pedreira, pasando por Luis Pimentel, Claudio Rodríguez Fer ou Luisa Villalta. Todos eles están en Seara. Discover Galician literature through its texts/Descubre a cultura galega a través dos seus textos, un espazo web que nace para ofrecer unha selección decantada que percorre a historia da literatura galega. Nesta seara, presentada na véspera do Día Internacional da Tradución que se celebra cada 30 de setembro, os textos dos creadores galegos estarán na versión orixinal, pero tamén na súa tradución ao inglés. A presidenta do Consello da Cultura Galega (CCG), Rosario Álvarez, e a coordinadora técnica do proxecto, a profesora e tradutora estadounidense Kathleen Nora March, presentaron en rolda de prensa este espazo que amosa textos inéditos canda outros máis coñecidos, algúns deles tamén recitados para, en palabras da presidenta, “amadores e amadoras das linguas e da literatura, desde calquera lugar e cultura”.

Céltiga foi o punto de encontro da intelectualidade galega residente na Arxentina entre os anos 1924 e 1932, período durante o cal se difundiu a cabeceira. Editada pola Empresa Céltiga. Sociedad Anónima Cooperativa Limitada, concibiuse como unha revista cultural ilustrada de liña galeguista e nela colaboraron figuras tan destacadas como Castelao, Maside, Suárez Couto, Francisco Asorey ou Luis Ksado. A publicación completa foi dixitalizada hai case unha década e incorpórase agora ao Repertorio da prensa da emigración galega, proxecto que mantén o Arquivo da Emigración Galega (AEG) do Consello da Cultura Galega (CCG).

“O 15-M doce anos despois: crise do Réxime ou Restauración?” é o título da nova sesión do ciclo Pensarmos, que terá lugar o 25 de maio (18:00 horas), na sede de Portas Ártabras - Amigos dos Museos de Galicia da Coruña. Nela, Cristina Fallarás e David Rodríguez conversarán con Xoán Antón Pérez Lema arredor do movemento do 15-M e o que supuxo para España e para Galicia. A actividade está organizada pola Sección de Pensamento do Consello da Cultura Galega (CCG) e coordinada por Celia Pereira Porto. A xornada é presencial e non se poderá seguir en directo, pero será gravada e estará proximamente dispoñible na hemeroteca do CCG.

“Falareilles da patria aos desterrados, da libertade e redencións aos servos”. Estes versos de Curros Enríquez eran o lema de Galicia, o xornal editado pola Federación de Sociedades Gallegas de la República Argentina como continuación da cabeceira El Despertar Gallego. 105 números desta publicación, os editados en 1932 e 1933, incorpóranse este mes ao Repertorio da prensa da emigración galega, proxecto que mantén o Arquivo da Emigración Galega (AEG) do Consello da Cultura Galega (CCG).