O plenario da Real Academia Galega acordou esta mañá que Begoña Caamaño (1964-2014) fose a figura homenaxeada nas Letras Galegas 2026. Nada en Vigo e finada en Santiago de Compostela, narradora, xornalista, activista incansable foi unha voz imprescindible do feminismo galego. A súa biografía está dispoñible no Álbum de Galicia, colección de biobliografías do Consello da Cultura Galega, nunha entrada escrita por Amanda Álvarez.
20/06/2025
20/06/2025
A presidenta do Consello da Cultura Galega, Rosario Álvarez, e o alcalde do concello de Ribeira, Luis Antonio Pérez Barral, asinaron este xoves un protocolo de colaboración para a realización de actividades conxuntas. Esta colaboración institucional facilitará a realización de actividades relacionadas co patrimonio marítimo e coa memoria democrática. No acto estiveron tamén estiveron presentes o tenente de alcalde Vicente Mariño de Bricio e o xerente do CCG, Marcelino Fernández.
19/06/2025
O Repertorio da prensa da emigración galega, proxecto que mantén o Arquivo da Emigración Galega (AEG) do Consello da Cultura Galega (CCG), incorpora este mes de maio do boletín oficial informativo do Consello de Galiza. Son cinco números que van de 1963 a 1967, que se corresponden co intento de refundación da entidade orixinal que fora creada en 1944 en Montevideo por Castelao.
18/06/2025
Co gallo da conmemoración do Día Internacional do Orgullo LGBTIQ+ que se celebra cada 28 de xuño, o Centro de Documentación en Igualdade e Feminismos (CDIF) do Consello da Cultura Galega celebra este xoves 19 (9:45 horas) unha nova xornada do ciclo Pensar con Orgullo. Co título “As violencias LGBTIfóbicas: armarios, biopoderes e formas de resistencia” expertas en filosofía, dereito, activismo, comunicación e creación artística debaterán nas eivas na lexislación e as dificultades para presentar as denuncias que sofren as persoas cando son obxecto dunha agresión. Ademais, ese mesmo día, a hemeroteca feminista A Saia, incorpora o fanzine Galicia Nazón Cuir á súa colección.
18/06/2025
O Álbum de Galicia, colección de biografías do Consello da Cultura Galega (CCG), incorpora hoxe a entrada de Manuela Cambronero (Lugo, 1821- Santiago de Compostela, 1853). Unha das primeiras mulleres dramaturgas en castelán, escritora tamén de prosa e poesía, adscrita á corrente literaria do romanticismo. Iris Iglesias Segade é a autora da entrada que está dispoñible no web do CCG.
17/06/2025
A presidenta do Consello da Cultura Galega, Rosario Álvarez, participou este luns na constitución oficial do Consello de Transferencia, un órgano chamado a canalizar, fortalecer e facer máis bidireccional a conexión entre o coñecemento xerado no centro e os retos da contorna. O acto, celebrado no Edificio Fontán da Cidade da Cultura, contou coa participación da presidenta, do equipo directivo do centro e os representnates da Dirección Xeral de Turismo da Xunta de Galicia, da Fundación Juana de Vega, da Caixa Rural Galega, da Rede Europea de Loita contra a Pobreza (EAPN Galicia), da Fundación RIA e do Consello Económico e Social de Galicia.
17/06/2025
O Consello da Cultura Galega (CCG) celebra o vindeiro mércores, 25 de xuño (16:30 horas), a quinta mesa do proxecto Un país coa súa lingua. Foro Participativo, coordinado por Dolores Vilavedra e que pretende ofrecer medidas propositivas para recuperar o vigor do galego. A xornada titúlase “Economía, turismo e deporte”, está a cargo do profesor Jackson R. Soares, e reflexionará sobre a situación do idioma nestes tres eidos. A mesa ten abertas as vías de participación e que tamén se poderá seguir en liña. As mesas do foro rematan o martes 8 de xullo cunha análise á situación do galego na sociedade, crenzas e participación comunitaria coordinada por Rosalía Fernández Rial.
17/06/2025
O Museo Pazo de Tor, en Monforte, acolle este mércores (a partir das 10:00 horas) a última sesión do ciclo “Acceso á cultura”, co que a Comisión Técnica Temporal de Xestión e Políticas Culturais do Consello da Cultura Galega (CCG) que coordina Paula Cabaleiro, revisa a situación deste dereito en Galicia. Nesta ocasión prestarase atención ao acceso á cultura desde a multiperspectiva da interseccionalidade das desigualdades. Encarna Lago coordina esta cita na que se amosarán diferentes experiencias para amosar como o xénero, a etnia, a clase social, a procedencia, a diversidade funcional, os ciclos de vida ou mesmo o territorio se cruzan e crean barreiras complexas. A xornada non se emite en directo pero será gravada e os vídeos subiranse ao web da institución.
16/06/2025
A nova xornada do ciclo Revisando a nosa arte aborda o legado do renovador descoñecido, Manuel Torres (Marín, 1901-1995). Carlos L. Bernárdez, Antón Sobral e Ángeles Tilve participan neste encontro coordinado por Ramón Rozas e organizado pola Sección de Creación e Artes Visuais Contemporáneas do Consello da Cultura Galega (CCG). A sesión, que se celebra no museo que leva o nome do homenaxeado (martes 17 de xuño, 17:00 horas), non se emite en directo pero será gravada e subirase ao sitio web da institución.
11/06/2025
O Álbum de Galicia, colección de biografías do Consello da Cultura Galega (CCG), incorpora hoxe a entrada de Ángel Brage Villar (Santiago de Compostela, 1903 – 1983). Foi director de orquestra teatral, profesor de piano e director da Escola Municipal de Música de Santiago. Loitou porque se recoñecera a música como disciplina universitaria e mantivo activa a Escola durante a Guerra Civil e Posguerra. David Ferreiro Carballo asina a entrada que está dispoñible para consultar no web do CCG.
11/06/2025
O wolframio, os mártires de Carral, a Federación de Sociedades Galegas, o dolmen de Dombate, o castro de Santa Tegra ou a Porta de Carlos V son lugares significativos da memoria colectiva galega. Son tamén as seis entradas que abren o proxecto Lugares de memoria co que o Consello da Cultura Galega (CCG) pretende profundar no coñecemento da nosa historia. Estará conformado por 75 entradas que poñerán o acento nas interpretacións, permanencias e legado na memoria colectiva do país. “Pretende ser unha viaxe polo noso patrimonio e pola nosa historia” apuntou a presidenta do CCG, Rosario Álvarez, na inauguración da xornada “Lugares de Memoria de Galicia: historia e lembranza” coa que se abriu publicamente este proxecto. Xunto con ela, Xosé M. Núñez Seixas, vicepresidente do CCG e coordinador do proxecto, destacou que este catálogo virtual irá incorporando novas entradas progresivamente.
11/06/2025
“Pensamento visual e fotografía” é o nome da xornada coa que a Sección de Creación e Artes Visuais Contemporáneas do Consello da Cultura Galega (CCG) afonda desde o MARCO de Vigo (xoves 12 e venres 13 a partir das 11:00 horas), sobre o estado da fotografía contemporánea. Manuel Vilariño e Rosendo Cid coordinan esta sesión na que participarán durante dous días investigadores, escritores e figuras representativas da fotografía e das artes visuais como Mar Caldas, Paco Gómez, Rebecca Mutell ou Andrea Costas, entre outros. A presidenta do CCG, Rosario Álvarez, e o director do MARCO, Miguel Fernández Cid, abren esta xornada que se emite en directo desde o web e a canle de YouTube da institución.
10/06/2025
O Consello da Cultura Galega (CCG) organiza este mércores, 11 de xuño (10:00 horas) a xornada “Lugares de Memoria de Galicia: historia e lembranza”. Xosé M. Núñéz Seixas, Ramón Villares, Xurxo Ayán, Ana Cabana e Emilio Ínsua participan nesta sesión que serve de presentación do proxecto “Lugares de memoria”, un catálogo virtual que contará con 75 entradas que profundan no coñecemento histórico do país a través de espazos, conceptos, prácticas, obxectos ou outro tipo de elementos revestidas dun significado particular e cambiante por parte dunha comunidade ao longo do tempo. A sesión pode seguirse en directo desde o web do CCG e da canle de YouTube da institución.
10/06/2025
“Arqueoloxía: un bo plan para coñecer Galicia este verán” é o título da nova entrega de Proxector, iniciativa de divulgación en lingua galega, promovida polo Centro de Documentación Sociolingüística de Galicia (CDSG) do Consello da Cultura Galega (CCG) co apoio da Universidade de Santiago (USC). Con esta entrega, que fai un percorrido polo noso patrimonio arqueolóxico, o catálogo xeral do proxecto supera os 2.000 recursos audiovisuais de divulgación en galego.
09/06/2025
A delegación da organización estoniana URALIC Centre for Indigenous Peoples, ONG con base en Estonia que promove os dereitos lingüísticos das comunidades indíxenas, especialmente do ámbito urálico, visitou o Consello da Cultura Galega. Foron recibidos por Xosé M. Núñez Seixas, vicepresidente da institución. Na xuntanza tamén participou marcos Maceira, presidente da Mesa pola Normalización lingüística, dado que ambas entidades pertenecen á Rede Europea de Linguas Minorizadas, ELEN.
06/06/2025
A Rianxeira, Lela e outras cancións populares resoaron nas voces do medio milleiro de nenos e nenas que, por mor da chuvia, tiveron que desprazarse ao pavillón municipal Jose Abuín “Chema” de Rianxo na novena edición de No bico un cantar. “Esta é unha actividade pensada para a rapazada, auténticos protagonistas, para que sexa unha experiencia rica e inesquecible”, apuntou a presidenta do Consello da Cultura Galega (CCG), Rosario Álvarez, no inicio desta actividade que o CCG organiza xunto coas consellerías de Educación, Ciencia, Universidades e Formación Profesional e de Cultura, Lingua e Xuventude da Xunta de Galicia mais a colaboración do Concello de Rianxo. O conselleiro de Cultura, José López Campos, destacou que a iniciativa “leva tempo poñendo en valor aos persoeiros da nosa cultura entre a mocidade e que, como non podía ser doutro xeito, este ano é especial ao sumarse á celebración do Ano Castelao”. Maximino Zumalave dirixiu este gran coro acompañado da formación de metais Hércules Brass con Rosa Aneiros como mantedora. Ademais, anunciouse que a vindeira edición terá lugar en Vilalba cos poetas da Terra Chá como protagonistas.
05/06/2025
500 nenos e nenas de toda Galicia, aos que se lle suma a colaboración especial do Instituto Arxentino Galego Santiago Apóstol de Bos Aires, participarán este venres en Rianxo na novena edición de No bico un cantar. O proxecto pon música á tradición literaria galega e está organizado polo Consello da Cultura Galega coas consellerías de Educación, Ciencia, Universidades e Formación Profesional e de Cultura, Lingua e Xuventude da Xunta de Galicia máis a colaboración do concello de Rianxo. O concerto terá lugar ás 18:00 horas na praza Rafael Dieste (en caso de chuvia trasladarase ao pavillón municipal, José M. Abuin "Chema"). O 75º aniversario do pasamento de Afonso Daniel Rodríguez Castelao centra o programa desta edición na que destaca a estrea absoluta de Daniel, peza composta para a ocasión por José Luís do Pico Orjais con arranxos musicais de Juan Durán.
04/06/2025
O Álbum de Galicia, colección de biografías do Consello da Cultura Galega (CCG), incorpora hoxe a entrada de Elsa Sánchez de Oesterheld (Bos Aires, 1925-2015), defensora dos dereitos humanos, integrante da Asociación Civil Avoas de Praza Maio. Dedicou a súa vida a procurar aos seus netos, nados en cativerio, despois do golpe militar de 1976 en Arxentina, co que perdeu á maior parte da súa familia. Carme Vidal é a autora da entrada que está dispoñible para consulta no web do CCG.
30/05/2025
O teatro, tanto en galego como en castelán, ocupou unha parte importante do lecer da colectividade galega emigrada en Arxentina a principios do século XX. A mesa redonda “O teatro galego na diáspora: o caso da Arxentina (1900-2025)” que organiza o Arquivo da Emigración Galega (AEG) do Consello da Cultura Galega (CCG) o vindeiro luns, 2 de xuño (18:00 horas), reflexiona desde diferentes ámbitos sobre un dos fenómenos máis rechamantes da cultura galega na diáspora. A xornada presencial, pode seguirse en directo a través do web do CCG e as redes sociais.
29/05/2025
En 1899 un grupo de galegos emigrados ao Río de Xaneiro decidiu unirse coa intención de crear unha sociedade que servise de referente para a colectividade galega residente no Brasil. Constituíronse un ano máis tarde baixo o nome “Centro Gallego do Rio de Janeiro”. Libros de actas, estatutos, a contabilidade e folletos de numerosas actividades conforman a documentación desta sociedade que o Arquivo da Emigración Galega, centro do Consello da Cultura Galega (CCG), vén de subir á rede no marco do proxecto Memoria documental das sociedades da emigración galega. Unha iniciativa que permite visibilizar material procedente das entidades microterritoriais creadas na diáspora galega para axudar a coñecer mellor o fenómeno migratorio.
28/05/2025
O Álbum de Galicia, colección de biografías do Consello da Cultura Galega (CCG), incorpora hoxe a entrada de Xoán Manuel Lípez Eirís (Carballo, 1952- A Coruña, 2017). Foi un actor, escenógrafo e deseñador de vestiario e unha figura pioneira do Teatro Independente Galego que participou na fundación da Escola Dramática Galega. Ao longo da súa vida profesional estivo vencellado a Casahamlet, traballou co actor e dramaturgo, Manuel Lourenzo e diversas agrupacións como o Teatro Circo, a Compañía Luís Seoane, o Centro Dramático ou Teatro Elsinor. Ana Abad de Larriva é autora da entrada que xa está dispoñible.
27/05/2025
Empregar o galego e a identidade galega como pilar estratéxico nas empresas é unha das propostas que se abordaron no marco da xornada “Comunicación, cultura e acción exterior”, coordinada por Marta Veiga Izaguirre no marco de Un país coa súa lingua. Foro participativo que dirixe Dolores Vilavedra. A experiencia do RC Celta, en boca de André Taboada Alonso, ou a campaña “A universidade de Vigo (UVigo), a proba! da man de Benigno Salgado son dous modelos que apostan por esta vía. “Debemos construír narrativas inspiradoras que aumenten a nosa con(s)ciencia, destacar a idea de participar nun proxecto comunitario atractivo para progresar cara a unha nova cultura vehiculada a través do galego. Os músicos e artistas galegos estano facendo. Oliver Laxe acaba de facelo” apuntou Benigno. Na sesión puxéronse enriba da mesa outras medidas concretas como accións específicas para o desenvolvemento do galego nas ferramentas de intelixencia artificial, mudar o modelo de axudas a medios de comunicación para que se potencie o idioma e, no exterior, que os organismos que conten con persoal apoien as actividades das redes de voluntariados que fomentan a cultura galega. A seguinte xornada do foro terá lugar o xoves 27 de xuño coa mesa “Economía, deporte e turismo”, moderada por Jakson R. Rodrigues Soares.
27/05/2025
“Foi un artista, un empresario capaz de unir calidade estética e produto industrial e, entre moitas outras cousas, un intelectual comprometido” asegurou Rosario Álvarez, presidenta do Consello da Cultura Galega (CCG) na apertura da xornada “Isaac Díaz Pardo. Azul Compostela” coa que a Comisión Técnica Temporal de Xestión e Políticas Culturais do CCG lembrou a súa figura e a súa conexión coa cidade de Santiago de Compostela. Ademais da xornada que homenaxea a Díaz Pardo no ano en que se lle dedica o Día das Artes Galegas, a institución acaba de incorporar preto dun centenar de cartas que o intelectual mantivo con Valentín Paz Andrade. O epistolario preséntase acompañado dun texto contextualizador a cargo do historiador e expresidente do CCG, Ramón Villares.
23/05/2025
A sección de Patrimonio e Bens Culturais do Consello da Cultura Galega (CCG) organiza este venres 23 de maio (16:00 horas) nos IES Fontem Albei da Fonsagrada a xornada “Comunidades e patrimonio cultural inmaterial: a música o canto e o baile”. Nela abordarase, desde unha perspectiva comunitaria, os procesos de protección do patrimonio vivo. A situación do flamenco, do canto alentejano e do baile tradicional galego son obxecto de análise e reflexión nesta cita coordinada por Noemí Basanta, Carme Campo e Ana Estévez Lavandeira. A sesión non se emite en directo pero será gravada e subirase ao web do CCG.
22/05/2025
As artes escénicas, os museos e actividades relacionadas co patrimonio cultural e os departamento de cultura de concellos, deputacións e Xunta son as que perciben unha maior demanda de produtos culturais en galego entre a poboación máis nova. A maioría das entidades do sector cultural, o 74,4%, manifesta que aumentaría a súa produción ou actividade en galego se se poñen en marcha medidas de apoio. Son algunhas das principais conclusións do informe Demanda e oferta de produtos e servizos culturais en galego para a infancia e a mocidade, que presentaron este xoves en rolda de prensa a presidenta do Consello da Cultura Galega (CCG), Rosario Álvarez, e o responsable do Observatorio da Cultura Galega, Håkan Casares. “Este estudo responde a unha liña de traballo da institución que analiza os dereitos lingüísticos culturais da cidadanía e, ademais, pretendíamos atender a eivas e lagoas que fomos percibindo a través doutros informes e nas nosas actividades nos últimos anos” apuntou a presidenta na súa intervención. Pola súa banda, Håkan Casares destacou que “hai demanda, falta oferta e, se se toman medidas, o ámbito cultural está disposto a incrementar a produción”. O documento xa está dispoñible para descarga.
21/05/2025
A antropóloga María Dolors Comas d’Argemir (Barcelona, 1951) defenderá este xoves (18:00 horas) no Consello da Cultura Galega (CCG) unha visión crítica e transformadora dos coidados, especialmente no contexto actual no que se produce un avellentamento progresivo da poboación. A súa intervención, que terá carácter dialogado con Ana Isabel García Arias (Lugo, 1968), profesora de economía aplicada da Universidade de Santiago de Compostela (USC), forma parte do ciclo Pensarmos co que a Sección de Pensamento do CCG propón reflexionar sobre cuestións de actualidade. A cita, coordinada por Celia Pereira Porto, emítese en directo desde o web institucional e a súa canle de YouTube.
20/05/2025
Acceso á cultura e comunicación é o nome da nova xornada do ciclo Acceso á cultura en Galicia 2025, que desenvolve a Comisión Técnica Temporal de Xestión e Políticas Culturais, do Consello da Cultura Galega (CCG) que coordina Paula Cabaleiro. Esta sesión, que terá lugar este mércores 21 de maio (16:00 horas) en Soutomaior, pretende analizar e recoller datos a partir das experiencias de oito proxectos que se desenvolven na provincia de Pontevedra. A sesión está coordinada por Marián Fernández, non se emite en directo pero será gravada e subirase á hemeroteca web do CCG á maior brevidade posible.
19/05/2025
A presidenta do Consello da Cultura Galega (CCG), Rosario Álvarez, e a presidenta do Consello Galego de Relacións Laborais (CGRL), Antía Sandez, reuníronse esta mañá na sede do CCG. Na xuntanza, á que asistiu a directora do Centro de Documentación en Igualdade e Feminismos (CDIF), Carme Adán; acordáronse, entre outras medidas, darlle difusión de Actuar, recoñecer e restaurar: Manual contra as violencias machistas a través das organización sindicais e empresariais que conforman o CGRL.
17/05/2025
O Pazo da Cultura de Carballo encheuse no serán deste venres na VX edición do Concerto das Letras Galegas, co que o Consello da Cultura Galega (CCG) abre os actos de conmemoración do 17 de maio. “Celebrar a figura das cantareiras lémbranos a importancia de fortalecer os vencellos comunitarios, deixar a un lado o individual e procurar o que nos une”, indicou a vicepresidenta do CCG, Dolores Vilavedra, na presentación deste concerto, que ofreceu unha viaxe sonora pola tradición popular oral do país cunha envoltura sonora de jazz. Once músicos, agrupados en Do Bertau, formación coordinada por Richi Casás e creada especificamente para a ocasión, ofreceron una mostra dos milleiros de textos e músicas creadas durante séculos e que perduraron na memoria do pobo. A presidenta do CCG, Rosario Álvarez; o alcalde de Carballo, Evencio Ferrero; o presidente da Real Academia Galega, Henrique Monteagudo; o director xeral de Cultura, Anxo Lorenzo, e mais unha ampla representación da cultura e da sociedade galegas asistiron a este encontro, que se poderá ver este sábado na segunda canle da TVG (23:00 horas).
15/05/2025
O Pazo da Cultura de Carballo acolle este venres (20:30 horas) a 15ª edición do Concerto das Letras Galegas do Consello da Cultura Galega (CCG). Comparsas, xotas, pasodobres e outros cantos tradicionais conforman un programa que homenaxea ás cantareiras e á literatura popular oral. Será unha ocasión única xa que o concerto correo a cargo de once artistas que conforman Do Bertau, unha formación efémera creada expresamente para este concerto e que fusionará o legado tradicional cunha envoltura contemporánea. As entradas están esgotadas pero poderá seguirse en directo en streaming desde o web do CCG (consellodacultura.gal) e o Día das Letras Galegas na G2.