O Consello da Cultura Galega (CCG) realizou na tarde deste xoves, 12 de marzo, unha sesión plenaria ordinaria na que se produciron cambios na súa composición. Nesta ocasión tomaron posesión os membros designados polas institucións que conforman o CCG e entran no Plenario Marilar Aleixandre, Pilar Bermejo, Miguel Fernández Cid, César Llana e Paula Pita. Ademais, abriuse e o prazo para a presentación de candidaturas na quenda de personalidades electivas da cultura galega. Na sesión fíxose avance da actividade do segundo trimestre.
13/03/2026
12/03/2026
As políticas culturais municipais son fundamentais para o desenvolvemento da cultura en Galicia. As administracións locais son as máis próximas á cidadanía, manteñen as infraestruturas e programacións básicas e garanten o acceso da cidadanía á cultura. A V xornada “Cultura e concellos” da Comisión Técnica de Xestión e Políticas Culturais do Consello da Cultura Galega (CCG), coordinada por Alberto García, aborda a situación da cultura municipal a través da exposición dunha serie de retos, ferramentas e casos prácticos para coñecer a súa situación a día de hoxe. A presidenta do CCG, Rosario Álvarez; a coordinadora da comisión, Paula Cabaleiro; máis o responsable da sesión, Alberto García, inauguran esta sesión que tamén se seguir en directo desde o web corporativo e a nosa canle de YouTube.
11/03/2026
Emigrantas: emerxer do silencio é o novo proxecto expositivo do Consello da Cultura Galega (CCG), co apoio da Xunta de Galicia e do Concello da Coruña. A través do diálogo entre materiais procedentes de arquivos, instalacións artísticas, fotografías, cartas, materiais audiovisuais e obxectos persoais, a mostra achégase ás historias das mulleres galegas silenciadas polos relatos oficiais da emigración. Rosario Álvarez, presidenta do CCG; Inés Rey, alcaldesa da Coruña; Zeltia Lado, directora xeral de Formación e Cualificación para o emprego; máis Antía Pérez Caramés, comisaria xunto con Keina Espiñeira e María Alonso, inauguraron a mostra no serán do mércores no Kiosko Alfonso onde se pode visitar ata o 3 de maio. Uqui Permui é a responsable do deseño expositivo que visibiliza historias como as de Cruz Risco, Ana Kiro, Fina Mantiñá, Luz Fandiño, Mimina e moitas outras voces anónimas que constrúen un relato da emigración galega nunca antes explorado.
10/03/2026
A sede do Consello da Cultura Galega (CCG) acolleu na mañá deste martes a constitución da Comisión de Proxección institucional de Galicia do Observatorio da Lusofonía. A entidade constitúese no marco do cumprimento do regulamento de funcionamento interno do Observatorio da Lusofonía Paz Andrade, creado polo decreto 134/2023, do 28 de setembro.
10/03/2026
A entrega de marzo de “Proxector”, iniciativa de divulgación en lingua galega que elaboran o Centro de Documentación Sociolingüística de Galicia (CDSG) coa Universidade de Santiago de Compostela (USC), céntrase na “Perspectiva de xénero na investigación: cara a unha ciencia de calidade”. No ronsel do 8M, Día Internacional da Muller, ofrece “unha escolma de recursos nos que a muller é o centro do estudo e debate, co ánimo de reivindicar unha ciencia de vangarda que corrixa os puntos cegos da investigación tradicional e achegue unha foto completa da realidade”.
09/03/2026
«Probaré que en sola la seixebra se tiene abreviada una botica», apunta Martín Sarmiento (1695-1772) na súa obra Discurso crítico-botánico sobre el vegetable gallego Seixebra, unha publicación inédita do frade. A presidenta do Consello da Cultura Galega (CCG), Rosario Álvarez; o editor da publicación e coordinador do Proxecto Sarmiento, Henrique Monteagudo; e Rafael Loureiro, transcritor do catálogo, presentaron esta publicación xunto coa edición dixital do Catálogo da biblioteca de Martín Sarmiento, realizada a partir do manuscrito autógrafo. Ambas publicacións déronse a coñecer no cuarto Día do Naturalismo Galego, fixado na data do nacemento do frade. Segundo explicou Rosario Álvarez, «permiten avanzar no coñecemento e na difusión dun precursor do pensamento moderno e dunha das figuras máis avanzadas da Ilustración».
06/03/2026
O vindeiro luns, 9 de marzo, é o Día do Naturalismo Galego por coincidir no día do nacemento Martín Sarmiento, primeiro estudoso da natureza de Galicia. O Consello da Cultura Galega (CCG) celebra esta data coa presentación (luns, sede do CCG, 11:00 horas) de dúas obras de Sarmiento, a edición en volume do Discurso crítico-botánico sobre el vegetable gallego "Seixebra" e a edición dixital do Catálogo da biblioteca de Martín Sarmiento. Ademais, o CCG e a Delegación del CSIC en Galicia, a través da Unidade de Cultura Científica, e en colaboración con el INCIPIT-CSIC, organizan o obradoiro “Observando a vida nos parques de Compostela”. A actividade, prevista inicialmente para este sábado 7 de marzo, adíase para o 25 de abril por mor da previsión meteorolóxica.
06/03/2026
O Consello da Cultura Galega (CCG) traballa arredor do movemento feminista e da situación das mulleres de xeito permanente e continuado ao longo de todo o ano. Con todo, arredor da data 8 de marzo, Día Internacional da Muller, desenvólvense algunhas accións concretas para reforzar e visibilizar esta liña de traballo. Coma vén sendo habitual; en colaboración coa Filmoteca de Galicia, prográmanse audiovisuais producidos ou dirixidos por mulleres no ciclo “Olladas de muller” que cumpre 14 edicións e, durante os venres do mes de marzo, o CDIF incorporará ao web novos fondos documentais e hemerográficos. Ademais, o CCG inaugurará o día 11 de marzo a mostra “Emigrantas. Emerxer do silencio” que visibiliza a emigración galega desde unha perspectiva de xénero, nunca antes abordada en profundidade.
04/03/2026
Entre 1987 e 1996 creáronse en Galicia tres destacadas formacións musicais sinfónicas: a Xove Orquestra de Galicia (que desapareceu en 1995), a Orquestra Sinfónica de Galicia e a Real Filharmonía de Galicia. A Sección de Artes Escénicas, Musicais e Audiovisuais do Consello da Cultura Galega (CCG) revisa este xoves 4 de marzo (10:30 horas) o seu papel e futuro. Forma parte dun ciclo que afonda no papel das institucións culturais galegas actuais que arrincou o pasado novembro coa análise do Centro Dramático Galego. Entre 1987 e 1996 creáronse en Galicia tres destacadas formacións musicais sinfónicas: a Xove Orquestra de Galicia (que desapareceu en 1995), a Orquestra Sinfónica de Galicia e a Real Filharmonía de Galicia. A Sección de Artes Escénicas, Musicais e Audiovisuais do Consello da Cultura Galega (CCG) revisa este xoves 4 de marzo (10:30 horas) o seu papel e futuro. Forma parte dun ciclo que afonda no papel das institucións culturais galegas actuais que arrincou o pasado novembro coa análise do Centro Dramático Galego. Rosario Álvarez, presidenta do CCG, e Montse Capelán, coordinadora da xornada xunto con Cristina Domínguez, inauguran esta sesión que se pode seguir en directo no web e na canle de YouTube da institución.
03/03/2026
“A pandeireta galega. Actualización dun instrumento ancestral” é o título da exposición coa que o Consello da Cultura Galega (CCG) pretende poñer en valor o labor de mestres artesáns, músicos e estudosos da pandeireta. O proxecto ábrese este mércores (4 de marzo) na sede do Real Coro Toxos e Froles cunha sesión de relatorios (18:00 horas) arredor dos usos e das técnicas deste instrumento e da importancia da transmisión usando como exemplo as pandeireteiras de Rois. Despois, Rosario Álvarez, presidenta do CCG; Arturo Lamas, presidente do coro ferrolá; e os comisarios da exposición, Luciano Pérez Díaz e Suso Vaamonde Manteiga, inaugurarán a mostra.
03/03/2026
O ciclo “Olladas de muller”, iniciativa do Consello da Cultura Galega (CCG) máis a colaboración da Filmoteca de Galicia, regresa ao fío do 8 de marzo para achegar filmes dirixidos, protagonizados ou de temática central sobre as mulleres. Esta 14 edición, que se desenvolve entre o 10 e o 14 de marzo, ofrece ademais unha viaxe polo cinema feito por mulleres que narran a emigración desde a súa propia experiencia ou desde a memoria doutras que marcharon seleccionadas por Beli Martínez e Keina Espiñeira.
28/02/2026
“Emigrantas. Emerxer do silencio” é o novo proxecto expositivo do Consello da Cultura Galega (CCG). A mostra recupera e visibiliza a través de materiais de diferente tipo, as historias da emigración das mulleres galegas que foron silenciadas do relato oficial durante décadas. Comisariada por Antía Pérez Caramés, Keina Espiñeira e María Alonso Alonso e con deseño expositivo de Uqui Permui, inaugúrase o próximo 11 de marzo no Quiosco Alfonso da Coruña.
27/02/2026
A Galicia rexistrou en 2024 4.540 concertos de música popular e consolida a recuperación tras a caída da pandemia, aproximándose a niveis pre-COVID en número de eventos. Así o recolle o último documento de traballo do Observatorio da Cultura Galega “A música popular en Galicia. Análise e perspectivas” que tamén indica que “case a metade das persoas que asistiron a concertos de música actual fixérono no contexto dun festival, unha proporción superior á estatal”. Tamén pon en evidencia cambios no comportamento da cidadanía xa que un “20,6% da poboación galega declara que viu algún concerto en liña no último ano”.
26/02/2026
“A adaptación é clave. Precisamos que o ritmo de ascenso da temperatura como consecuencia do cambio climático sexa menor ca o ritmo de incremento do punto crítico de temperatura” asegurou a meteoróloga Beatriz Hervella na xornada “Saúde no tempo que cambia”, que organizou a Sección de Ciencia, Natureza, Tecnoloxía e Sociedade, coordinada por Elena Vázquez Cendón. Unha idea na que insistiron os especialistas de diferentes disciplinas e que achegaron medidas concretas: mellorar a información e o coñecemento do impacto perante fenómenos meteorolóxicos para poder adaptarnos mellor; modificar o urbanismo para crear áreas de protección natural ou refuxio climáticos; implicar á cidadanía na toma de decisións; ou dimensionar o problema para que a sociedade entenda que cómpre facer cambios que terán efectos a longo prazo. A sesión, coordinada por Susana Bayo, foi gravada e as intervencións están dispoñibles para futuras consultas no web do CCG.
26/02/2026
O Arquivo da Emigración Galega do Consello da Cultura Galega (CCG) vén de poñer a disposición da cidadanía varios libros de actas da sociedade Centro Recreativo União do Rio Tea (CURT). É unha das últimas entidades de emigrantes galegos creadas no Brasil, que non só segue activa, senón que é das máis dinámicas na promoción e preservación da cultura galega no estado da Bahía. O material difúndese no marco do proxecto Memoria Documental das Sociedades da Emigración Galega, que ten como obxectivo poñer en valor fondos documentais para ofrecer un mellor coñecemento e comprensión da traxectoria da emigración galega.
25/02/2026
O cambio climático non é só unha cuestión ambiental ou económica, senón tamén un problema de saúde pública global que xa está a ter consecuencias directas e indirectas sobre a vida das persoas. Sobre esta idea, a Sección de Ciencia, Natureza, Tecnoloxía e Sociedade do Consello da Cultura Galega (CCG) organiza este xoves (a partir das 9:15 horas) a xornada “Saúde nun clima que cambia”. Unha sesión que reflexiona sobre os efectos do cambio climático na saúde humana e as dimensións tanto físicas como sociais e psicolóxicas deste fenómeno global da man de expertos como Ricardo García Mira, Cristina Gómez Román, Beatriz Hervella Nogueira e Dominic Royé. A coordinadora da sección, Elena Vázquez Cendón, máis a coordinadora da xornada, Susana Bayo, inaugurarán esta cita presencial que se pode seguir en directo desde o web do CCG.
24/02/2026
A filóloga estadounidense Kathleen March (Rochester, Nova York, 1949) e o edafólogo Francisco Díaz-Fierros (Vilagarcía de Arousa, 1941) recibiron este martes as medallas do Consello da Cultura Galega (CCG) en recoñecemento á súa contribución ao desenvolvemento das actividades da institución. As laudatios estiveron a cargo, respectivamente, da filóloga Ana Luna e do historiador e expresidente do CCG Ramón Villares, que destacaron as súas traxectorias profesionais, así como o seu papel en proxectos do CCG como Seara ou o Álbum da Ciencia. A presidenta do CCG, Rosario Álvarez, abriu o acto, ao que asistiron o presidente do Parlamento de Galicia, Miguel Ángel Santalices; o secretario xeral da Lingua, Valentín García; o delegado do Goberno en Galicia, Pedro Blanco, e a alcaldesa de Santiago, Goretti Sanmartín, entre outras personalidades da sociedade e da cultura galega.
24/02/2026
“A crítica de arte en Galicia no contexto actual. Novas olladas” é o título da nova sesión do ciclo “Arte en Tempo real" que organiza a Sección de Creación de Artes Visuais do Consello da Cultura Galega (CCG). María Marco, Manuel Padín e Marisol Salanova, voces relevantes do panorama artístico contemporáneo, reflexionan sobre o papel da crítica de arte no ecosistema cultural galego. Paula Cabaleiro e Patricia Verdial coordinan esta sesión que se pode seguir en directo desde o web corporativo e a nosa canle de YouTube.
19/02/2026
O informe “Acceso á cultura en Galicia”, elaborado pola Comisión Técnica de Xestión e Políticas Culturais do Consello da Cultura Galega (CCG), coordinada por Paula Cabaleiro, conclúe que non existe unha percepción social de cumprimento efectivo dos dereitos culturais en Galicia. A presidenta do CCG, Rosario Álvarez, xunto coa coordinadora da sección, Paula Cabaleiro, e a redactora do texto e membro da comisión, Ruth Sousa, presentaron esta mañá o informe nunha rolda de prensa celebrada na sede da institución. “É un informe cunha metodoloxía diferente, que recolle información ao longo de todo un ano e que se sitúa na propia razón de ser da entidade, que ten entre os seus cometidos garantir a cultura”, asegurou Rosario Álvarez. O documento, elaborado tras un proceso no que participaron arredor de 500 persoas de perfil variado, insta as administracións a cumprir a lexislación en materia de accesibilidade, mellorar a formación dos profesionais e fomentar o coñecemento destes dereitos entre a cidadanía.
13/02/2026
O Centro de Documentación en Igualdade e Feminismos (CDIF) vén de poñer en rede nova documentación de Begoña Caamaño (Vigo, 1964-Santiago de Compostela, 2014), figura homenaxeada no Día das Letras Galegas. Nesta ocasión trátase dunha serie de entrevistas e de artigos publicados en Ar!. Revista galega antimilitarista, da que Caamaño de cuxo consello de redacción formaba parte. Os textos recollidos, publicados entre 1994 e 1997, amosan unha autora fondamente implicada coa denuncia do Servizo Militar Obrigatorio (SMO), coa defensa da insubmisión e coa recuperación da memoria das vítimas da militarización.
11/02/2026
Como foi o primeiro envío dun correo electrónico en Galicia? E como foi posible a construción da Ponte de Rande? E a súa posterior ampliación? Os seus protagonistas explícano no marco do proxecto “Diálogos Interxeracionais”, promovido pola Sección de Ciencia, Tecnoloxía, Natureza e Sociedade do Consello da Cultura Galega (CCG) que coordina Elena Vázquez Cendón. Javier Méndez Zunzunegui é o responsable desta iniciativa que busca fomentar vocacións científicas mediante conversas distendidas entre alumnado de bacharelato e profesionais. As gravacións das primeiras sesións, sobre a evolución da física e da enxeñaría de camiños en Galicia, xa están dispoñibles. A vindeira cita terá lugar en Nigrán, o 26 de marzo, e afondará na evolución da enxeñaría aeronáutica e do espazo con Isaura Clavero, Yanina Hallak e Claudia Álvarez Souto.
06/02/2026
A figura de Valentín Lamas Carvajal (Ourense, 1849-1906) está unida á publicación O Tío Marcos d’a Portela, pioneira dos medios de comunicación en galego. Este sábado 7 de febreiro, día en que se cumpren 150 anos da saída á rúa da histórica cabeceira, Ourense acollerá varios actos de homenaxe. Un roteiro polos lugares destacados na vida de Lamas Carvajal, unha placa conmemativa, un concerto e un xantar popular lembrarán a importancia do seu legado. O Consello da Cultura Galega (CCG) xunto cunha serie de entidades deseñaron o programa que se estenderá ao longo de todo o ano.
05/02/2026
Os Servizos de Normalización Lingüística (SNL) e os Equipos de Dinamización da Lingua Galega (EDLG) son dous colectivos que contan con máis de tres décadas de traxectoria e que resultan esenciais para a revitalización e o uso social do galego. Teñen un gran potencial humano pero necesitan dun cambio estrutural e de apoio económico para poder desenvolvelo. Reforzalos, incrementar os orzamentos e aproveitar as experiencias e os recursos que xestionan son algunhas das propostas que figuran nas conclusións dos XXVII Encontros para a Normalización Lingüística que se desenvolveron en outubro pasado. O documento de conclusións propón a derrogación do Decreto para o plurilingüismo, que a inspección educativa vele polo cumprimento dos Proxectos Lingüísticos de Centro, a aprobación urxente dunha normativa de ámbito supramunicipal que regule os SNL, ademais dun cambio de actitude das administracións públicas e un maior compromiso a todos os niveis. O documento, así como os vídeos das sesións, están dispoñibles para consulta.
04/02/2026
Desde Suíza ata Ponte Sampaio pasando por Portomarín, Castrelo de Miño ou o Panteón Real da Catedral de Santiago. En total 12 lugares físicos ou simbólicos conforman a segunda entrega de “Lugares de Memoria”, proxecto do Consello da Cultura Galega (CCG) coordinado por Xosé Manoel Núñez Seixas. Un catálogo virtual que abrangue dende a Prehistoria ata a Idade Contemporánea, a Galicia territorial e mais a Galicia da diáspora. As novas entradas xa se poden consultar desde o web da institución.
03/02/2026
A presidenta do Consello da Cultura Galega (CCG), Rosario Álvarez, recibiu na mañá deste martes a visita do presidente da Federación Galega de Municipios e Provincias (FEGAMP), Alberto Varela. A xuntanza tiña como obxectivo abordar vías de colaboración e futuros proxectos comúns. Na xuntanza estiveron presentes o xerente do CCG, Marcelino Fernández, e a secretaria xeral da FEGAMP, Patricia Vilán.
02/02/2026
“A pandeireta galega. Actualización dun instrumento ancestral” é o título da exposición coa que o Consello da Cultura Galega (CCG) pretende poñer en valor o labor de mestres artesáns, músicos e estudosos da pandeireta. O proxecto ábrese este luns (2 de febreiro) no espazo expositivo do Pazo Provincial da Deputación de Pontevedra cunha sesión de relatorios (18:00horas) arredor dos usos e das técnicas deste instrumento. Despois, a presidenta do CCG, Rosario Álvarez, xunto cos comisarios, Luciano Pérez Díaz e Suso Vaamonde Manteiga, inauguran a mostra, que se poderá poderá visitar ata o 27 de febreiro.
02/02/2026
Jaume Franquesa (Igualdada, 1976), antropólogo recoñecido polo seu traballo no ámbito da enerxía, o medio ambiente e a política rural en Europa, participa este martes (17:00 horas) na terceira sesión do ciclo “Encontros Temáticos Transversais dende o Patrimonio Cultural” que organiza a Sección de Patrimonio e Bens Culturais do Consello da Cultura Galega (CCG). Nesta ocasión abórdase o impacto da transformación enerxética no sistema local. A xornada continúa o mércores 4 (17:00 horas) co debate a cargo de profesionais que traballan no ámbito galego sobre este asunto. A cita, coordinada por Teresa Nieto, Rebeca Blanco-Rotea e Carlos Amoedo, emítese en directo a través do web do CCG e a súa canle de YouTube.
30/01/2026
O 30 de xaneiro celébrase o Día da Ilustración, que nesta edición se lle dedica a Siro López (Ferrol, 1943), referente da caricatura en Galicia. O Consello da Cultura Galega (CCG) súmase á efeméride convocada pola Asociación Galega de Profesionais da Ilustración (AGPI) coa posta na rede do fondo Colección Siro López. No propio día da celebración publicaranse no web institucional o fondo doado polo autor á institución, que contén 61 caricaturas de persoeiros da cultura, así como unha entrevista en profundidade realizada por Xermán Hermida para culturagalega.gal, o portal de divulgación cultural do CCG.
29/01/2026
Libros de actas das xuntas directivas e das asembleas xerais de socios, libro de enderezos de asociacións de emigrantes galegos cos que manteñen correspondencia... son algúns dos materiais que o Arquivo da Emigración Galega do Consello da Cultura Galega (CCG) garda da sociedade de emigrantes chamada Alianza Céltigos, Incio, Corbelle y sus contornos. Hoxe non existe, foi fusionándose con outros centros ata ser unha parte do actual Centro Galicia. A historia desta entidade e dos seus documentos poden consultarse na rede no marco do proxecto Memoria Documental das Sociedades da Emigración Galega.
27/01/2026
Nortada, Vendaval, Soán, Poñente, Nordés, Levante e Ábrego son os nomes tradicionais da meteoroloxía popular e mariñeira galega dos ventos segundo a súa dirección de procedencia. Tamén dan nome a “Seteventos”, o último proxecto de pódcast do Consello da Cultura Galega (CCG). Nel abórdase en sete capítulos as interaccións de Galicia con outros países, culturas ou dinámicas históricas. A presidenta do CCG, Rosario Álvarez, destacou na presentación que o proxecto pretende “amosar a interacción entre Galicia e calquera outra dirección e, de paso, amosar o fondo enorme de gravacións e materiais do CCG”, mentres que o coordinador da Área de Produción de Contidos e Difusión, Manuel Gago, explicou que “encaixa nunha liña da institución de trasladar a cultura galega a todos os formatos”. Na rolda de prensa tamén estiveron Gabri Fuentes e David Gesteira, autores do pódcast, que parte da escolma de fitos, persoas ou acontecementos representativos para conectar con outras zonas do mundo empregando unha narrativa contemporánea. Os sete episodios xa están dispoñibles en Ágora, a plataforma de pódcast do CCG, así como nas principais plataformas: iVoox, Spotify e YouTube.