Aborto. Corenta anos de mobilizacións é o título do recurso que se acaba de incorporar á Sextina, proxecto do Centro de Documentación en Igualdade e Feminismos (CDIF) do Consello da Cultura Galega (CCG) que divulga semestralmente documentos pouco coñecidos pola súa antigüidade, tipoloxía ou procedencia. A publicación presenta unha achega cronolóxica e documental sobre as actividades que levaron a cabo diferentes agrupacións feministas para reclamar a legalización e gratuidade do aborto desde a década dos setenta ata o ano 2014. Carteis, pancartas, adhesivos, fotografías e referencias documentais son algúns dos materiais recompilados nesta monografía, que xa está dispoñible para a súa descarga no sitio web corporativo.
03/06/2024
31/05/2024
As palabras de Otero Pedrayo, Risco e Álvaro de las Casas resoaron nas voces dos trescentos cincuenta nenos e nenas que encheron o Castelo de Ribadavia na oitava edición de No bico un cantar. “Esta é unha actividade moi querida por nós. Programámola pensando nas nenas e nenos que son os protagonistas do día, para que sexa unha experiencia rica e inesquecible”, apuntou a presidenta do Consello da Cultura Galega (CCG), Rosario Álvarez, no inicio desta actividade que a institución organiza xunto coas consellerías de Educación, Ciencia, Universidades e Formación Profesional e de Cultura, Lingua e Xuventude da Xunta de Galicia e mais coa colaboración do Concello de Ribadavia. O conselleiro de Cultura, José López Campos, destacou que este concerto, que pecha unha xornada de convivencia e o traballo de todo un ano, “adobía con acerto música, lecer e patrimonio”. Maximino Zumalave dirixiu este gran coro acompañado da formación de metais Hércules Brass. Ademais, anunciouse que a vindeira edición terá lugar en Rianxo con Castelao como protagonista, cando se fan 75 anos do seu pasamento.
31/05/2024
O patrimonio sonoro centra este venres, 31 de maio, a xornada titulada “Transformando a música en patrimonio” da Biblioteca de Galicia, institución cabeceira do sistema de bibliotecas da nosa comunidade. Na cita, dirixida a profesionais e persoas interesadas en saber como funcionan as institucións da memoria, analizarase a situación actual deste tipo de patrimonio. O Arquivo Sonoro de Galicia participa cun relatorio titulado “Arquivo Sonoro de Galicia: fonte para o estudo da nosa identidade”.
30/05/2024
Máis de trescentos cincuenta nenos e nenas participan este venres na oitava edición de No bico un cantar. Unha cita que xunta música, literatura e mocidade nun encontro que arrinca pola mañá, coa chegada do alumando procedente dos conservatorios de música profesional de Galicia xunto coas escolas de música da zona, e remata co concerto (18:00 horas) no Auditorio Rubén García do Castelo de Ribadavia. Maximino Zumalave dirixe esta actuación organizada polo Consello da Cultura Galega (CCG), as consellerías de Educación, Ciencia, Universidades e Formación Profesional e a de Cultura, Lingua e Xuventude da Xunta de Galicia, coa colaboración do Concello de Ribadavia. A escritora Rosa Aneiros é a mantedora deste acto ao que asiste a presidenta do CCG, Rosario Álvarez; o Conselleiro de Cultura, José López Campos; e o alcalde de Ribadavia, César Fernández. No programa destaca a estrea absoluta de Vos nova, peza composta para a ocasión por Aaron Siebert sobre texto de Otero Pedrayo.
30/05/2024
A ciencia e a tecnoloxía ocupan o noveno lugar entre os asuntos de interese para a cidadanía galega. A evolución deste indicador nas dúas últimas décadas é positiva, aínda que decae con respecto a 2018 e Galicia está 2,3 puntos por debaixo da media española na evolución histórica. Son algúns dos achados do documento de traballo Percepción social da ciencia e da tecnoloxía en Galicia, que acaba de facer público o Observatorio da Cultura Galega, servizo dependente do Consello da Cultura Galega (CCG). O documento xa está dispoñible para a súa descarga.
29/05/2024
O Álbum de Galicia, a colección biobibliográfica do Consello da Cultura Galega (CCG), incorpora a entrada de Ramón Piñeiro (Armea de Abaixo, Láncara, 1915 – Santiago de Compostela, 1990) no ronsel do aniversario do seu nacemento, que se conmemora este venres 31. Filósofo, ensaísta, publicista e académico, o seu compromiso co dereito ao autogoberno do pobo galego e coa defensa da lingua e cultura propias erixírono como un dos principais referentes do galeguismo do século XX. Xosé Luís Pastoriza Rozas asina a entrada, na que destaca o seu papel na Lei de normalización lingüística, aprobada por unanimidade en 1983, ano en que foi elixido primeiro presidente do CCG.
27/05/2024
O centenario da publicación do primeiro número de Nós, voceiro da histórica entidade, centra o programa da oitava edición de No bico un cantar, unha actividade organizada polo Consello da Cultura Galega (CCG) que pon música á tradición literaria galega para divulgala entre o alumnado dos conservatorios e centros de ensino musical de toda Galicia. Máis de trescentos cincuenta nenos e nenas participarán neste encontro, que terá lugar no Auditorio Rubén García do Castelo de Ribadavia o vindeiro 31 de maio (18:00 horas). A presidenta do CCG, Rosario Álvarez, destacou na presentación “a recuperación deste proxecto que se tivo que suspender por mor da pandemia, que xunta música, literatura e mocidade e co que contribuímos a crear un corpus musical coa encarga dunha composición, que nesta ocasión recae en Aaron Siebert e leva por título Vos nova sobre texto de Otero Pedrayo”. O director xeral de Cultura, Anxo Lorenzo e o subdirector xeral de Aprendizaxe Permanente, Ensinanzas Artísticas, Idiomas e Deportivas, Rubén Vázquez destacaron na rolda os traballos de preparación previos levados a cabo desde os conservatorios, mentes que o alcalde de Ribadavia, César Fernández, agradeceu a escolla desta localidade para lembrar a Xeración Nós. Maximino Zumalave, director do concerto destacou que “a música sempre se asocia aos días de festa, e precisamente isto é o que imos desenvolver este venres, unha gran festa que xunta a mocidade cantando na nosa lingua coa nosa música”.
23/05/2024
A nova entrega de Memoria documental das sociedades da emigración galega , iniciativa que mantén o Arquivo da Emigración Galega (AEG) do Consello da Cultura Galega (CCG), divulga a documentación pertencente á Unión Progresista del Distrito de Salvatierra de Miño en Buenos Aires. A sociedade foi creada pola colectividade de salvaterrenses na Arxentina co fin de axudar as e os compatriotas emigrados, así como de promover o desenvolvemento do seu concello natal. Entre os fondos documentais que se difunden neste mes de maio inclúense a acta de fundación da entidade, os libros de actas das reunións societarias, algúns dos seus balances e memorias, así como a correspondencia enviada e recibida.
22/05/2024
Migracións, asistencia social e igrexas na Europa da posguerra é o título da xornada que o Arquivo da Emigración Galega (AEG) do Consello da Cultura Galega (CCG) organiza os días 23 e 24 de maio na sede institucional. A cita, que ten como obxectivo analizar a axuda que prestaron as diferentes confesións para velar polo coidado das persoas emigradas e refuxiadas, reunirá diferentes especialistas de Italia, Francia, Portugal, Suíza e España. A presidenta do CCG, Rosario Álvarez, inaugurará a xornada xunto cos seus coordinadores, Luís Domínguez Castro e José Ramón Rodríguez Lago. A actividade é presencial, pero poderá seguirse en directo a través do sitio web e as redes sociais corporativas.
22/05/2024
Genoveva Vázquez Calviño (Ponte Barxes, Bande, 1896 – Xinzo de Limia, 1971) exerceu como parteira nas zonas rurais de Ourense durante medio século, un labor polo que chegou a ser coñecida e respectada en toda a provincia. O Álbum de Galicia, a colección dixital de biografías que mantén o Consello da Cultura Galega (CCG), acaba de incorporar a súa entrada cun texto asinado pola Asociación Escola Rural de Saúde da Limia.
20/05/2024
A complexa e fecunda personalidade de Béla Bartók (1881-1945) centra a conferencia que Rogelio Groba pronunciou a principios dos anos oitenta na Coruña, con ocasión do centenario do nacemento do compositor húngaro. Esta intervención, que forma parte do Fondo Ramiro Cartelle, é a nova entrega do proxecto Caligrafías musicais, iniciativa do Arquivo Sonoro de Galicia (ASG) do Consello da Cultura Galega (CCG) que recupera bimestralmente conferencias destacadas de prestixiosos estudosos do eido musical galego. A conferencia estivo acompañada de intervencións musicais e nela Groba destaca os trazos máis destacados da personalidade, biografía e carreira musical de Bartók.
16/05/2024
A Unión Progresista del Distrito de Salvatierra de Miño en Buenos Aires, posteriormente renomeada como Asociación Residentes de Salvatierra de Miño en la República Argentina, puxo en marcha en 1946 unha revista para celebrar os seus vinte e cinco anos de existencia. Tras esta primeira época, retomouse a súa publicación en 1997 cunha cabeceira que mantiña os mesmos obxectivos que a súa predecesora: conmemorar os aniversarios sociais da entidade editora. O Repertorio da prensa da emigración galega, proxecto que mantén o Arquivo da Emigración Galega (AEG) do Consello da Cultura Galega (CCG), suma aos seus fondos neste mes de maio un número da primeira época (1946) e cinco da segunda, publicados entre os anos 1999 e 2010.
16/05/2024
A celebración do Día das Letras Galegas arrincou coa décimo cuarta edición do Concerto das Letras Galegas, proposta musical e sonora do Consello da Cultura Galega (CCG) que este ano contou co apoio do Concello da Coruña. Un concerto que conciliou a faceta musical e literaria de Luísa Villalta e no que se estreou a ópera de cámara Concerto para un home só a partir da obra teatral homónima da homenaxeada e composta por Federico Mosquera. A presidenta do CCG, Rosario Álvarez; o presidente da Real Academia Galega, Víctor Freixanes; o secretario xeral da Lingua, Valentín García; a familia Villalta Gómez e unha ampla representación da sociedade e da cultura galegas encheron o Teatro Colón. O concerto poderá verse este venres na segunda canle da TVG (23:13 horas), no marco da programación especial para o Día das Letras.
15/05/2024
Literatura e música son dúas facetas vencelladas á escritora e violinista Luísa Villalta (A Coruña, 1957-2004), homenaxeada este ano no Día das Letras Galegas. As dúas conflúen no programa da décimo cuarta edición do Concerto das Letras Galegas, iniciativa organizada polo Consello da Cultura Galega (CCG) que este ano conta co apoio do Concello da Coruña. O Teatro Colón acolle mañá (xoves 16, 20:30 horas) esta cita, que corre a cargo do Grupo Instrumental Siglo XX, dirixido por Florian Vlashi. No programa, alén dos compositores preferidos da homenaxeada, estrearase a peza Concerto para un home só, baseada na obra homónima de Luísa Villalta, que o CCG lle encargou a Federico Mosquera (A Coruña, 1986) para a ocasión. O concerto, de entrada libre ata completar a capacidade, tamén se poderá seguir en directo no web do CCG e nas plataformas da CRTVG.
15/05/2024
Xohana Torres (Santiago de Compostela, 1929 – Vigo, 2017) consolidouse como unha figura fundamental da literatura galega contemporánea. Escritora e tradutora pioneira, cultivou diferentes xéneros, como a poesía, a narrativa, a literatura infantil ou o teatro. A través das súas obras foi quen de crear unha “voz propia, que se uniu á súa fonda defensa da lingua e da cultura galegas, así como do papel da muller na sociedade, en xeral, e na arte, en particular”, subliña Ana Abad de Larriva. Ela é a autora da entrada que se incorpora hoxe ao Álbum de Galicia, a colección dixital de biografías que mantén o Consello da Cultura Galega (CCG).
15/05/2024
O pianista e doutor Alejo Amoedo acaba de ser nomeado membro de número do Instituto de Estudios Vigueses (IEV), institución dedicada á recuperación, divulgación e estudo de diversos temas relacionados coa cidade olívica e a súa contorna. O ingreso tivo lugar no serán deste 14 de maio nun acto desenvolto no Museo MARCO de Vigo. Amoedo é membro do Plenario do Consello da Cultura Galega (CCG), vogal da súa Comisión Executiva e director do Arquivo Sonoro de Galicia (ASG).
14/05/2024
Luísa Villalta: entender para vivir é a obra coa que o Consello da Cultura Galega (CCG) contribúe á celebración da figura homenaxeada nesta edición do Día das Letras Galegas. A presidenta do CCG, Rosario Álvarez, presentou esta publicación, que “naceu como un espazo para o diálogo entre a obra de Luísa e un monllo selecto de persoas que, sendo referentes no sistema cultural galego, mantiveron en vida vínculos coa autora e a súa obra”. Pola súa parte, Dolores Vilavedra, coordinadora do volume, destacou que son unha colección de textos que “amosan ben a natureza intrinsecamente dinámica e expansiva dun corpus precursor e versátil como poucos na nosa historia”. A publicación foi presentada nun acto ao que asistiu a familia de Luísa Villalta, representada na mesa pola súa irmá Susana, quen agradeceu a homenaxe, e Margarita Ledo, secretaria da Real Academia Galega (RAG), quen destacou que “este volume coincide coa achega diversa e comprometida da autora”. A obra xa está dispoñible para descarga no web do CCG.
13/05/2024
As violencias machistas maniféstanse de formas diferentes e en contextos variados. Estímase que en España máis de 1,3 millóns de nenas e mulleres maiores de dezaseis anos sufriron violencia sexual. “Aínda que levamos moitos anos traballando en contra das violencias machistas, e hai moitos documentos, era necesaria unha guía na nosa lingua que funcionase a modo de manual básico”, explicou Carme Adán, directora do Centro de Documentación en Igualdade e Feminismos (CDIF) do Consello da Cultura Galega (CCG) na presentación de Recoñecer, actuar e restaurar. Manual básico para afrontar as violencias machistas. A presidenta do CCG, Rosario Álvarez, destacou que “o manual permite ter todas as claves necesarias dunha maneira comprensiva e con diferentes niveis de lectura”. O documento, elaborado por unha comisión coordinada pola propia Carme Adán, xa está dispoñible para a súa descarga desde o web do CCG e distribuirase en centros de ensino, así como en concellos e en espazos orientados á muller.
13/05/2024
A presidenta do Consello da Cultura Galega (CCG), Rosario Álvarez, recibiu esta mañá a visita institucional de monseñor Francisco José Prieto Fernández, arcebispo da diocese de Santiago de Compostela. É a primeira visita do arcebispo á institución desde o seu nomeamento e asinou no libro de honra da institución.
13/05/2024
O Museu Arqueológico do Carmo (Lisboa) é o escenario elixido para a segunda sesión de Vidas paralelas, formato que o Consello da Cultura Galega (CCG) e a Universidade de Lisboa puxeron en marcha para poñer en valor figuras destacadas con traxectorias similares en Galicia e Portugal. Nesta ocasión, falarase de arqueoloxía con Rebeca Blanco-Rotea e André Teixeira, dúas figuras representantes dunha nova xeración de arqueólogos, con sólidas carreiras investigadoras arredor do patrimonio cultural fronteirizo. Xa se poden consultar no web do CCG as entrevistas previas que lles fixeron Xosé A. López Silva e Ana Tarrío, nas que ambos repasan as súas traxectorias profesionais. O coloquio presencial será o luns 13 de maio ás 17:00 horas.
12/05/2024
Recoñecer, actuar e restaurar. Manual básico para afrontar as violencias machistas é o título dun documento que o Centro de Documentación en Igualdade e Feminismos (CDIF) do Consello da Cultura Galega, dirixido por Carme Adán, presenta este luns 13 de maio (18:30 horas). Faino no marco dunha xornada co mesmo título, na que se ofrecerá unha panorámica actual da situación das violencias da man de expertas como Ana Belén Puñal Rama, Concha Fernández ou Laura Seara.
08/05/2024
Os trobadores Johan de Cangas, Martín Codax e Meendinho desenvolveron a súa actividade artística na área suroccidental de Galicia durante o período medieval. Cunha produción poética que se enmarca nas cantigas de amigo, cultivaron, dentro desta, a modalidade de santuario ou de romaría, ben no total da súa obra poética, ben nalgunhas composicións en particular. O Álbum de Galicia, a colección dixital de biografías que mantén o Consello da Cultura Galega (CCG), incorpora as entradas destes tres compositores da man de Xosé Bieito Arias Freixedo.
07/05/2024
Existen comunidades virtuais de divulgación científica en galego? Que valoran as persoas que crean contido á hora de escolleren a lingua en que se expresan? Cal é a resposta da audiencia? Como se poden apoiar as iniciativas en galego en novos espazos? Existe conexión entre esas esferas e a divulgación científica tradicional? Estas son algunhas das cuestións que se abordarán na xornada “A divulgación científica en galego nos novos espazos”, que se desenvolve este martes 7 de maio (16:30 horas) e na que participan, entre outros, Xurxo Mariño, Tamara Pazos Cordal ou Andrea Camacho Manzaneda. Manuel Vicente e Yolanda Casal organizan esta xornada, que busca abrir o debate e contribuír dalgún xeito a promover a presenza do idioma propio de Galicia nos novos formatos, ao tempo que facer unha reflexión sobre a situación en Cataluña e País Vasco. A xornada é presencial e pode seguirse en directo no web e nas redes sociais da institución.
02/05/2024
O Álbum de Galicia, colección biobibliográfica que mantén o Consello da Cultura Galega (CCG), acaba de incorporar a entrada de Jenaro de la Fuente Domínguez (Villa de Torquemada- Palencia, 1851 - Vigo, 1922). Xosé Ramón Fandiño é o autor da entrada deste arquitecto que foi unha peza fundamental na configuración da fisionomía arquitectónica do ensanche de Vigo.
02/05/2024
As fortificacións históricas construídas tras a independencia de Portugal, no século XVII, son hoxe un rico patrimonio cultural que se estuda desde diferentes ámbitos académicos. Co obxectivo de explorar e promover o coñecemento e a conservación das paisaxes defensivas transfronteirizas, o Consello da Cultura Galega (CCG) e a Universidade do Minho organizan este venres a xornada A arquitectura fortificada da Idade Moderna como construto da fronteira miñota. A presidenta do CCG, Rosario Álvarez, inaugura esta sesión, que se enmarca no ciclo “Conversas na Raia”, e que nesta ocasión se desenvolve en Vila Nova de Cerveira.
30/04/2024
Os espazos de xestión comunal teñen unha longa historia en territorios como Galicia. Porén, malia a súa importancia en termos tanto cuantitativos como cualitativos, a dificultade para encadralos dentro do modelo de explotación actual do territorio rural provoca que sexan tamén un foco de conflitos. Así o subliñaron os diferentes expertos e expertas que participaron esta mañá en Casaio na nova sesión do ciclo In Situ dos Encontros Monográficos co Patrimonio Cultural, titulada A materialidade dos espazos comunais. A presidenta do Consello da Cultura Galega (CCG), Rosario Álvarez, destacou na inauguración a importancia de abordar este tema por primeira vez e que debe ser tido en conta á hora de abordar a xestión do territorio. Canda ela, interviñeron as tres persoas coordinadoras da sesión, Lara Barros Alfaro, Rebeca Blanco-Rotea e Carlos Tejerizo, quen subliñou que os espazos de xestión comunal “se conservan mellor en Galicia que noutros sitios de Europa” e que Casaio “é unha zona onde estes espazos foron e son moi importantes a día de hoxe como exemplo de xestión comunitaria do territorio”.
30/04/2024
“A revolución dos Caraveis sentiuse en Galicia máis perto que noutras zonas do Estado” apuntou Xosé M. Núñez Seixas, vicepresidente do Consello da Cultura Galega no marco da xornada “O 25 de abril e máis nós. Unha ollada galega” que el mesmo coordinou. Unha cita na que historiadores como Ramón Villares e Emilio Grandío (ambos da Universidade de Santiago) e Manuel Loff (Universidade de Braga) incidiron nas diferenzas e semellanzas entre os procesos de transición democrática en Galicia e Portugal. A xornada pechou coas lembranzas de Margarita Ledo e Arturo Reguera, protagonistas e testemuñas directas da revolución que cumpriu neste 2024 cincuenta anos.
29/04/2024
A Sección de Patrimonio e Bens Culturais do Consello da Cultura Galega (CCG), en colaboración coa Asociación Científica Sputnik Labrego e a Comunidade de Montes de Casaio e Lardeira, organiza unha nova sesión do ciclo In Situ dos Encontros Monográficos co Patrimonio Cultural. A cita, que leva como título “A materialidade dos espazos comunais: pasado, presente e futuro das comunidades rurais do noroeste peninsular”, terá lugar este martes, 30 de abril (ás 10:00 horas), nas Antigas Escolas da localidade ourensá de Casaio (Carballeda de Valdeorras). No acto de inauguración intervirá a presidenta do CCG, Rosario Álvarez, xunto con Lara Barros Alfaro, Rebeca Blanco-Rotea e Carlos Tejerizo, coordinadores da xornada. A sesión non se poderá seguir en directo, pero será gravada e subida á hemeroteca do CCG.
25/04/2024
A colectividade de emigrantes do concello de Dodro e dunha das súas parroquias, Lestrobe, residentes na Arxentina agrupáronse en diferentes sociedades co obxectivo de apoiar a loita contra o caciquismo e promover a instrución e o desenvolvemento dos seus lugares de orixe. A Sociedad Cultural Hijos de las Tres Parroquias de Dodro, a Sociedad Hijos de Lestrove e a Unión Residentes de Dodro foron tres das asociacións creadas para tal fin. A nova entrega de Memoria documental das sociedades da emigración galega, iniciativa que mantén o Arquivo da Emigración Galega (AEG) do Consello da Cultura Galega (CCG), publica nestes mes de abril os fondos documentais destas sociedades microterritoriais, entre os que se inclúen os libros de actas, o rexistro dos asociados e asociadas ou a correspondencia enviada e recibida.
25/04/2024
Luísa Villalta (A Coruña, 1957-2004) foi, ademais dunha grande escritora, unha recoñecida violinista. Por iso, no programa desta edición do Concerto das Letras Galegas teñen unha presenza moi destacada os violíns e os compositores favoritos da homenaxeada este 17 de maio. A presidenta do Consello da Cultura Galega (CCG), Rosario Álvarez; o concelleiro de Fomento e Promoción da Cidade, Gonzalo Castro Pardo; a irmá de Luísa, Susana Villalta, e o director do Grupo Instrumental Siglo XX, Florian Vlashi, presentaron esta mañá o programa da décimo cuarta edición que busca, en palabras da presidenta, “unir literatura e música, dous fíos que están na propia biografía e actividade cultural de Luísa”. O concerto celebrarase na Coruña, cidade natal da homenaxeada (Teatro Colón, 20:30 horas), o 16 de maio, véspera do Día das Letras Galegas. A entrada é libre ata completar a capacidade.