O Consello da Cultura Galega (CCG) vén de poñer en marca o estudo sobre a lectura en Galicia. Na tarde deste martes a biblioteca da institución acolleu a primeira reunión de traballo á que asistiu máis dunha vintena de profesionais de ámbitos diversos relacionados coa lectura (biblioteca, asociación, narradores orais, ensino, edición, creación) que trasladaron a súa experiencia profesional e reflexión sobre a situación da lectura en galego. Ao mesmo tempo, a institución acaba de poñer en rede o último informe do Observatorio da Cultura Galega. Co título *O libro en Galicia: produción editorial, lingua e mercado* analiza a edición galega nos últimos anos e conclúe que conta cunha produción estable, cunha dimensión económica reducida e unha forte dependencia de determinados segmentos do mercado. O estudo tamén destaca que a fortaleza do sistema non reside “na dimensión industrial, senón na función cultural que cumpre dentro do ecosistema galego”.
07/10/2026
07/10/2026
Aida Fernández Ríos. Da produtividade das rías á acidificación oceánica, é o título da publicación que o Consello da Cultura Galega (CCG) e a Real Academia Galega de Ciencias (RAGC) lembran a traxectoria desta oceanógrafa, homenaxeada co Día da Ciencia en Galicia 2026 e que presentaron este mércores en presentaron este mércores en Vigo. “Non pretende ser unha biografía convencional nin un catálogo da súa produción científica senón ofrecer unha visión 360 grados dunha profesional que xuntou a dimensión científica e humana” en palabras do presidente da RACG, Juan Lema. A presidenta do Consello da Cultura Galega (CCG), Dolores Vilavedra, salientou a capacidade de Aida para “manter simultaneamente a mirada sobre Galicia e sobre os grandes procesos globais, cun ollo posto nas rías galegas e outro nos océanos”. Na presentación estaba tamén Beatriz Novoa, directora do Instituto de Investigacións Mariñas de Vigo (IIM-CSIC), centro que Aida Fernández Rios foi investigadora e directora. A publicación xa está disponible para descarga desde o web do CCG.
29/09/2026
O Consello da Cultura Galega (CCG) celebra o Día Internacional da Tradución, que se conmemora cada 30 de setembro, coa actualización de novos textos literarios en galego e inglés no proxecto “Seara. Discover Galician literature through its texts/Descubre a cultura galega a través dos seus textos”. Esta nova entrega diversifica estilos e preocupacións estéticas cun feixe de textos de María Xosé Queizán, Manuel Lourenzo, Anxo Angueira e María Mariño. Conta tamén cunha remodelación do seu deseño que facilita o acceso aos contidos e posibilita a lectura comparada.
28/09/2026
A presentación do libro Un demócrata fronte á barbarie fascista: vida e martirio de Enrique Peinador Porrúa, republicano galeguista (1902-1940), de Francisco Xavier Redondo Abal (Pontevedra, 1964 - Santiago, 2026), converterase nun acto de homenaxe e lembranza ao seu autor, finado o pasado mes de febreiro. O encontro, que terá lugar no Consello da Cultura Galega (martes 29, 18:30 horas), reunirá amizades, comunidade académica e universitaria para reivindicar a figura e o legado dun investigador profundamente comprometido coa recuperación da memoria histórica de Galicia.
24/09/2026
A sociedade “Hijos del Ayuntamiento de Oleiros” foi creada en 1918 por un grupo de persoas do concello coruñés de Oleiros residentes en Bos Aires. Libros de actas, revistas e outros documentos que permiten coñecer a traxectoria e actividade desta entidade súbense hoxe á rede no marco do proxecto “Memoria documental das sociedades da emigración galega”. Unha iniciativa do Arquivo da Emigración Galega do Consello da Cultura Galega (CCG) que pon en valor estes fondos e facilitan o coñecemento da historia e da actividade das sociedades da diáspora galega.
24/09/2026
O ciclo “Mulleres, Patrimonios, Sociedade”, impulsado polo Consello da Cultura Galega coa colaboración do Camões - Instituto da Cooperação e da Língua, I.P. , celebra este venres e sábado en Vigo a súa oitava edición. O programa que, emprega o cinema como espazo de encontro entre Galicia e Portugal explorando as relacións entre mulleres, patrimonio, memoria e territorio, contará coa estrea de Crías, de Xiana do Teixeiro, un obradoiro coa directora e as proxeccións de Cienfuegos, 1913, de Margarita Ledo, e Mulheres, Terra, Revolução, de Rita Calvário e Cecília Honório.
23/09/2026
A intelixencia artificial está a transformar a maneira na que traballamos, creamos, nos informamos e nos relacionamos coa tecnoloxía. Sobre as preguntas que suscita sobre nós mesmos e sobre a sociedade que estamos construíndo, dialogarán o xornalista e escritor Pedro Vallín e a especialista en intelixencia artificial Alba Meijide na nova sesión do ciclo “Pensarmos” (xoves, 24 de setembro, ás 18:00 horas) organizada pola Sección de Pensamento do Consello da Cultura Galega (CCG). A sesión presencial, que leva por título “IA: hai alguén ao outro lado?”, poderá seguirse tamén en directo a través do web do CCG e da canle de YouTube.
22/09/2026
A creación de espazos de participación cidadá para a cogobernanza das institucións culturais, a incorporación de mecanismos de avaliación independente e a acreditación dos museos foron algunhas das medidas apuntadas no segundo encontro sectorial sobre A xestión dos espazos expositivos en Galicia, co que a Sección de Creación e Artes Visuais Contemporáneas do Consello da Cultura Galega (CCG) pretende achegar reflexións e propostas ante a situación producida en Galicia na xestión dos espazos expositivos tras o proceso de designación da dirección do CGAC. Na apertura da sesión, a presidenta do CCG, Dolores Vilavedra, destacou que o encontro pretende «achegar reflexións sobre boas prácticas adaptadas a cada momento», unha tarefa que, subliñou, «é unha das funcións como institución pública». Canda ela, a coordinadora da sección, Paula Cabaleiro, apuntou que este segundo encontro visibiliza o papel da crítica, da xestión e das políticas, ademais de convidar á participación no cuestionario que está aberto ata o 27. O proceso culminará no último trimestre do ano coa presentación dun informe final.
22/09/2026
A presidenta do Consello da Cultura Galega (CCG), Dolores Vilavedra, recibiu na mañá deste luns a visita de João Cardoso Rosas, vice-reitor para a Cultura, Inclusão e Responsabilidade Social da Universidade do Minho. No encontro repasáronse as principais liñas de colaboración entre ambas as institucións e abordáronse novas vías de cooperación e futuras iniciativas no ámbito da cultura, o patrimonio e a relación entre Galicia e Portugal.
21/09/2026
O Consello da Cultura Galega (CCG) celebra este martes 22 (16:00 horas) o segundo encontro sectorial sobre *A xestión dos espazos expositivos en Galicia*, unha iniciativa promovida pola Sección de Creación e Artes Visuais Contemporáneas que ten como obxectivo abrir un espazo de reflexión compartida sobre o funcionamento das institucións culturais, os modelos de dirección e xestión e as políticas públicas que determinan o desenvolvemento do sistema artístico galego. A presidenta do CCG, Dolores Vilavedra, e a coordinadora da sección, Paula Cabaleiro abren esta sesión presencial que se pode seguir en directo desde o web do CCG e a canle de YouTube.
18/09/2026
A presidenta do Consello da Cultura Galega (CCG), Dolores Vilavedra, recibiu na mañá deste venres a visita do delegado do Goberno en Galicia, Pedro Blanco, nun encontro no que abordaron diferentes cuestións relacionadas coa situación e a proxección da cultura galega.
18/09/2026
Cultura impresa: materialidades, paradigmas e retos epistémicos, é o título da monografía que acaba de editar o Consello da Cultura Galega (CCG). Reúne os textos presentados no XXIV Simposio do Instituto da Lingua Galega, celebrado os días 27 e 28 de novembro de 2024 na Facultade de Filoloxía da Universidade de Santiago de Compostela. Doce relatorios que abordan a cultura impresa desde perspectivas que van da filoloxía e a historia do libro aos estudos visuais, culturais e sociais. Iago Casas Neo, Elisa Nieves Barreiro e Dolores Vilavedra son os editores desta publicación impresa que tamén se pode descargar desde o web do CCG.
17/09/2026
A Comisión Executiva do Consello da Cultura Galega recibiu na mañá deste xoves os representantes do Grupo Parlamentario do Partido Socialista de Galicia-PSOE (PSdG-PSOE). A situación da cultura, o cambio climático, a lectura en galego e a IA son algúns dos temas que se abordaron no marco da xuntanza. O encontro fai parte da rolda de contactos que a presidenta do CCG, Dolores Vilavedra, está a manter cos diferentes grupos políticos con representación no Parlamento de Galicia. Este venres terá lugar o encontro co Delegado do Goberno en Galicia, Pedro Blanco.
17/09/2026
O Arquivo da Emigración Galega do Consello da Cultura Galega (CCG) vén de subir á rede, no marco do proxecto “Repertorio da prensa da emigración galega”, novos exemplares de Cultura Proletaria. Nesta xeira difúndense 156 números publicados entre 1938 e 1940 desta cabeceira que comezou a editarse en 1927.
16/09/2026
A Comisión Executiva do Consello da Cultura Galega recibiu na mañá deste mércores os representantes do Grupo Parlamentario do Partido Popular de Galicia (PPdeG). Na xuntanza abordáronse cuestións relacionadas coa situación da lingua galega, a lectura en galego, a accesibilidade á cultura, así como os desafíos e oportunidades que presentan para a cultura galega a intelixencia artificial. O encontro enmárcase na rolda de contactos que a presidenta do CCG, Dolores Vilavedra, está a manter cos diferentes grupos políticos con representación no Parlamento de Galicia. As visitas continuarán este xoves co Grupo Parlamentario do Partido Socialista de Galicia.
15/09/2026
A presidenta do Consello da Cultura Galega (CCG), Dolores Vilavedra, recibiu na mañá deste martes a visita do alumnado de quinto de secundaria do colexio hispano arxentino Santiago Apóstol. No encontro explicoulles o funcionamento da institución e a súa actividade, con especial atención aos recursos e materiais relativos a Arxentina. «É unha visita moi especial que agardamos con moito afecto desde a institución, porque sodes tamén unha parte de Galicia», sinalou Dolores Vilavedra durante a súa intervención.
11/09/2026
A Comisión Executiva do Consello da Cultura Galega recibiu na mañá deste venres a portavoz nacional do Bloque Nacionalista Galego (BNG), Ana Pontón. A reunión enmárcase na rolda de contactos que a presidenta do CCG, Dolores Vilavedra, manterá nas vindeiras semanas cos diferentes grupos políticos con representación no Parlamento de Galicia.
10/09/2026
A sede da institución acolleu na mañá deste xoves a 23ª edición do simposio anual da Asociación Galega de Editores, que leva por título "Apoio institucional ao comercio exterior do sector editorial". A presidenta do Consello da Cultura Galega, Dolores Vilavedra, participou na inauguración da sesión ratificando o compromiso co sector do libro e a lectura. Na súa intervención anunciou que nas vindeiras semanas se poñerá en marcha o xa anunciado estudo sobre a lectura en galego. Pola súa parte, Fran Alonso, vicepresidente da asociación, lembrou que este ano o encontro pretende coñecer outras experiencias de éxito que están a funcionar para falar de apoio institucional e de comercio exterior.
08/09/2026
“Proxector”, especial de divulgación en lingua galega promovido polo Centro de Documentación Sociolingüística de Galicia (CDSG) do Consello da Cultura Galega (CCG) e pola Universidade de Santiago de Compostela (USC), regresa este mes cunha nova escolma de audiovisuais dedicada á xestión forestal como ferramenta para previr os incendios e favorecer un aproveitamento sustentable do territorio.
14/08/2026
O Consello da Cultura Galega (CCG) expresa a súa satisfacción pola declaración do conxunto patrimonial de Meirás como Lugar de Memoria Democrática, formalizada pola Secretaría de Estado de Memoria Democrática e publicada hoxe, venres 14 de agosto, no Boletín Oficial do Estado.
14/08/2026
A Sección de Creación e Artes Visuais Contemporáneas do Consello da Cultura Galega (CCG) celebrará o vindeiro 22 de setembro, en Santiago de Compostela, o segundo encontro sectorial «A xestión dos espazos expositivos en Galicia a debate». A xornada dará continuidade ao proceso de reflexión iniciado o pasado 14 de xullo e centrarase nos modelos de xestión e dirección dos museos e centros de arte contemporánea, na gobernanza das institucións culturais e nas políticas culturais públicas. A inscrición, xunto co programa completo da actividade, ábrese o vindeiro 7 de setembro. Ademais, desde hoxe habilitouse no web do CCG un cuestionario de dez preguntas que permitirá recoller a opinión do sector e ampliar o número e a diversidade de voces incorporadas á reflexión.
11/08/2026
Non mirar ao Sol sen anteollos homologados, evitar desprazamentos innecesarios, planificar as viaxes e prever posibles retencións, ou organizar puntos de observación seguros e accesibles, con servizos e control de aforo. Son algunhas das recomendacións recollidas no documento Esperando a eclipse total de Sol. Recomendacións para as administracións públicas e a cidadanía, elaborado por un grupo de especialistas en astronomía, meteoroloxía, divulgación científica e saúde visual e presentado polo Consello da Cultura Galega o pasado mes de marzo. Ante a proximidade do fenómeno, o CCG volve poñer o documento a disposición das administracións e da cidadanía como guía para unha observación segura, ordenada e planificada.
11/08/2026
O Consello da Cultura Galega (CCG) incorpora ao seu patrimonio documental un fondo sonoro dixitalizado sobre Enrique X. Macías (Vigo, 1958-1995), resultado de varios anos de traballo de recuperación, investigación e dixitalización desenvolvido polo percusionista e investigador Roberto Oliveira-Ogando. A sede da institución acolleu esta mañá o acordo da cesión que asinaron a presidenta, Dolores Vilavedra; o investigador Roberto Oliveira; coa asistencia da alcaldesa de Salceda de Caselas, Loli Castiñeira e do director do Arquivo Sonoro de Galicia, Alejo Amoedo. “É un exemplo de colaboración entre moitas entidades que permite contribuír a preservar o noso patrimonio musical” apuntou a presidenta no marco do acto.
07/08/2026
O Consello da Cultura Galega (CCG) será distinguido como Entidade Arraiana 2026 no marco das IX Xornadas Arraianas, que se celebrarán este sábado, 8 de agosto, en Entrimo (Ourense). O recoñecemento, promovido polo Colectivo Arraianos, pon en valor o compromiso da institución coa investigación, difusión e preservación da cultura e da memoria compartida dos territorios de fronteira entre Galicia e Portugal.
19/07/2026
O Consello da Cultura Galega (CCG) ofreceuse como espazo de encontro, mediación e coordinación para contribuír ao fortalecemento da rede de Centros de Estudos Galegos (CEG), unha das principais ferramentas para a difusión internacional da lingua e da cultura galegas. A proposta formulouse no marco da xornada “Os Centros de Estudos Galegos a debate”, que reuniu o pasado venres no Consello especialistas de universidades europeas e americanas, persoal lector e responsables de políticas de internacionalización lingüística para analizar a situación actual da rede e identificar posibles liñas de mellora.
17/07/2026
A presidenta do Consello da Cultura Galega (CCG), Dolores Vilavedra, mantivo este venres un encontro co conselleiro de Cultura, Lingua e Xuventude, José López Campos, para abordar os detalles da proposta de actualización do Plan Xeral de Normalización da Lingua Galega. A presidenta congratulouse de que o documento recollese unha parte importante das propostas formuladas polo CCG no documento de conclusións do foro Un país coa súa lingua, presentado o pasado mes de outubro, aínda que que se aprecian diferenzas no alcance dalgunhas medidas e nos instrumentos previstos para a súa aplicación. No encontro estaba tamén presente Valentín García, secretario xeral da Lingua.
16/07/2026
Mery Pais (Santiago, 1990), Julia Huete (Ourense, 1990), Rosendo Cid (Ourense, 1974), Manuel Quintana Martelo (Santiago, 1946) e Yolanda Dorda (Barcelona, 1975) son os cinco artistas que se incorporan a Atalaia, plataforma web de creación contemporánea galega que promove a Sección de Arte e Creación Visuais Contemporáneas do Consello da Cultura Galega (CCG). Entrevistas, biografías e unha escolma da súa obra incorpóranse á plataforma que pretende contribuír a dar a coñecer a plástica galega.
16/07/2026
O Arquivo da Emigración Galega do Consello da Cultura Galega (CCG) vén de subir á rede, no marco do proxecto “Repertorio da prensa da emigración galega”, doce exemplares de Rosalía, revista mensual. Trátase do primeiro ano de vida da publicación editada pola delegación de Santiago de Cuba do Centro Galego de Cuba.
14/07/2026
A creación dunha mesa sectorial permanente como canle de diálogo entre o sector das artes visuais e as administracións, a necesidade de reforzar a gobernanza independente e a autonomía das institucións culturais, a recuperación dun plan director para o Centro Galego de Arte Contemporánea (CGAC), o cumprimento do Código de Boas Prácticas e a incorporación de mecanismos de transparencia nos procesos de selección figuran entre as principais conclusións do primeiro encontro sectorial titulado “A xestión dos espazos expositivos en Galicia”, organizado polo Consello da Cultura Galega (CCG). Estas propostas completaranse coas achegas do segundo encontro, previsto para o 22 de setembro, e servirán de base para un informe final que o CCG presentará no último trimestre do ano.
10/07/2026
“Escola, cultura e territorio” é o proxecto co que o Consello da Cultura Galega (CCG) e as deputacións da Coruña e de Lugo promoverán e darán visibilidade ás iniciativas culturais que se desenvolven en ámbitos non urbanos. A presidenta do CCG, Dolores Vilavedra, xunto coas responsables das áreas de Cultura de ambas as deputacións, Natividade González e Iria Castro, respectivamente, asinaron na sede do Consello un protocolo de colaboración para impulsar esta iniciativa, que carece de dotación económica específica e que se concretará este ano no desenvolvemento de seis actividades. “Abrimos así un camiño para percorrer en común, que demostra que a colaboración entre institucións é posible e que parte do convencemento de que a cultura é unha ferramenta de cohesión social”, salientou Dolores Vilavedra.