No mes de setembro do ano 2008 o Consello da Cultura Galega publicou o libro titulado Papés d’emprenta condenada. A escrita galega entre 1797 e 1846 (I), que era o resultado dun traballo colectivo iniciado anos atrás co obxectivo de reunir a produción escrita en lingua galega durante as primeiras décadas do século XIX que se deu conservado ata hoxe e que á altura de 2008 se coñecía. Un ano despois, o simposio Lingua galega e comunicación nos inicios da Idade Contemporánea (Santiago de Compostela, 3-11 de novembro de 2009) serviu para presentar publicamente unha boa partedos traballos que ían conformar o volume de estudos que o lector ten agora nas mans. O intercambio de ideas entre os distintos conferenciantes e entre estes e os asistentes ás xornadas permitiu afinar os xuízos dos relatores e arrequentalos cos coñecementos e as refl exións doutras persoas.
Con toda a certeza, o aumento do cultivo escrito da lingua galega e da publicación de textos en galego garda estreita relación co xermolar dos sentimentos e ideoloxías galeguistas, que nos principios do século XIX, cando as vellas estruturas do Antigo Réxime empezaban a abanear levemente, se encontraban en estado aínda embrionario. Ora ben, ese aumento está tamén indubidablemente conectado coa aparición e o primeiro desenvolvemento da prensa en Galicia, propiciados polo vivaz debate público suscitado daquela entre os absolutistas e os liberais, é dicir, entre os partidarios de deixar estar as cousas tal como viñan estando desde había séculos e os que propugnaban a instauración dunha nova orde política e socioeconómica sustentada sobre a base do recoñecemento da soberanía popular. Os traballos que neste volume se agruparon constitúen unha reflexión colectiva sobre todos estes procesos.

Titulo	Papés d’emprenta condenada (v. II)
Subtítulo	Lingua galega e comunicación nos inicios da Idade Contemporánea
Edición	Ramón Mariño Paz
Autoría	Rosario Álvarez Blanco Rosa Aneiros Xosé Ramón Barreiro Fernández Javier Díaz Noci Ernesto González Seoane Jaume Guillamet Carme Hermida Xosé López García Ramón Mariño Paz Xurxo Martínez González Gonzalo Navaza Blanco Xosé Ramón Pousa Damián Suárez Vázquez Anxo Tarrío Varela
Limiar	Ramón Mariño Paz
Publicación	Santiago de Compostela: Consello da Cultura Galega; Instituto da Lingua Galega, 2012
Edición	1ª edición
Entidade	Consello da Cultura Galega; Instituto da Lingua Galega
Descrición física	570 p.; map.; 24 cm.
ISBN. Ed. papel	978-84-92923-29-8
Depósito Legal. Ed. papel	C 727-2012
CCG. Signatura. Ed. papel	CCG 2012 417
CCG. Código de barras Absysnet 1.6. Ed. papel	11203049
Colección	Ensaio & Investigacion
Materias	lingua historia
Código QR