física

Vídeo didáctico (12´ 12´´) no que Patricia Simal Campos nos explica diferentes aplicacións das lentes delgadas, un contido curricular de 2º de Bacharelato. En concreto, céntrase nestes catro tipos de aplicacións: a lupa, o microscopio composto, o telescopio e o ollo humano (corrección de defectos visuais).

Trátase dunha experiencia de innovación educativa baseada no método de “Aula Invertida”  aplicada ao Laboratorio de Física en Bacharelato.

Notas:
Fonte: Youtube

Vídeo didáctico (16´ 10´´) no que Patricia Simal Campos explica as ecuacións teóricas que fundamentan a práctica das lentes delgadas, un contido curricular de 2º de Bacharelato. Nesta peza explícase o desenvolvemento matemático da fórmula gaussiana das lentes delgadas e dedúcese a fórmula de Neuwton para lentes (fórmula equivalente da ecuación gaussiana ). Para rematar dedúcese a ecuación do aumento lateral das lentes.

Trátase dunha experiencia de innovación educativa baseada no método de “Aula Invertida”  aplicada ao Laboratorio de Física en Bacharelato.

Notas:
Fonte: Youtube

Vídeo didáctico (17´ 01´´) no que Patricia Simal Campos explica a práctica das lentes delgadas, un contido curricular de 2º de Bacharelato. Trátase do primero dun conxunto de tres vídeos nos que se presentan os obxectivos da práctica, o fundamento teórico e o resumo do procedemento experimental que debe desenvolverse no laboratorio.

Experiencia de innovación educativa baseada no método de “Aula Invertida”  aplicada ao Laboratorio de Física en Bacharelato.

Notas:
Fonte: Youtube

Vídeo de divulgación científica (4´ 39´´) , integrado na canle de Youtube “O Son das Ideas”, que che axudará a entender, partindo dun sinxelo exemplo cun vaso de auga, o concepto físico das lentes gravitacionais.

Notas:
Fonte: Youtube

Vídeo de divulgación científica (4´ 25´´) , integrado na canle de Youtube “O Son das Ideas”, no que descubrirás por que hai científicos que levan máis de 50 anos disparando raios láser contra a superficie lunar para intentar medir a distancia entre a Terra e a Lúa coa maior precisión posible.

Notas:
Fonte: Youtube

Vídeo de divulgación científica (3´ 14´´) , integrado na canle de Youtube “O Son das Ideas”, no que descubrirás se existe un tope máximo na velocidade da caída que experimentan os corpos debido á forza da gravidade.

Notas:
Fonte: Youtube

Vídeo (5´ 01´´) elaborado pola NASA que che permitirá sobrevoar a Lúa e coñecer as características da superficie lunar grazas ás imaxes da sonda Lunar Reconnaissance Orbiter (LRO).

Tradución ao galego do xornal Gciencia.

Notas:
Fonte: Youtube

Vídeo (4´ 34´´) de divulgación científica, difundido na canle SciShow, no que que Hank Green tenta explicar unha das dez preguntas científicas máis buscadas en Internet: que é a enerxía?

Tradución e subtítulos da Asociación de Tradutores Galegos.

Notas:
Fonte: Youtube

Neste vídeo (7') o profesor Cibrán Santamarina responde a se a luz é unha onda ou unha partícula e, segundo parece, depende das circunstancias. A peza forma parte da colección Vídeos didácticos USC.

Notas:
Fonte: Youtube

Vídeo (8' 42'') que debate sobre o concepto "partículas virtuais" e sobre o uso que del se fai.

Algunhas persoas defenden que se trata dunha conceptualización útil, xa que ao realizar cálculos con diagramas de Feynman é posible deseñar todas as interaccións posibles entre partículas e despois realizar os cálculos para determinar a resposta correcta. Pola contra, outros opinan que se trata dunha terminoloxía enganosa porque as partículas virtuais non se comportan como partículas reais e non se poden observar.

Notas:
Fonte: Youtube

Vídeo (56' 47'') que recolle a cuarta charla do ciclo de divulgación científica "Achegando a ciencia", que organiza o colectivo Caladiños. Nela, o físico Cibrán Santamarina fala sobre física cuántica e o sorprendente "mundo do pequeno".

Notas:
Fonte: Youtube

Vídeo (35' 36'') que recolle a intervención de Estíbaliz Espinosa, escritora, filóloga e membro da Agrupación astronómica Ío, no Naukas Coruña 2017.

Nela, reflexiona sobre a curiosidade que irmanda ciencia e humanidades. A fascinación pola vida, polo Universo, polo espazo que nos rodea. Que contan a literatura ou a arte sobre iso?

Notas:
Fonte: Youtube

Vídeo (39' 44'') que recolle a intervención de Marcos Pérez Maldonado, director técnico da Casa das Ciencias no Naukas Coruña 2017. 

Nela reflexiónase sobre o tipo de astronomía que estamos a aprender nunha época en que os novos descubrimentos sobre o cosmos chegan ata nós filtrados polos medios de comunicación (coa súa busca da noticia espectacular) e polas redes sociais.

Notas:
Fonte: Youtube

Notas:

Dominic Walliman preséntanos unha animación organizada a modo de mapa, que describe os dominios da física e os seus tres ámbitos fundamentais (física clásica, relatividade e física cuántica), así como os camiños que se poden transitar no futuro.

Tamén dispoñible como imaxe (en inglés).

Notas:
Fonte: Youtube

Vídeo divulgativo (5´ 18´´) , emitido no programa Ciencianosa da TVG, no que Jorge Mira explica a lei de indución de Faraday. Michael Faraday descubriu que o movemento dun imán no seo dun circuito eléctrico xeraba unha corrente eléctrica. Este experimento da indución electromagnética abriu o camiño da transformación da enerxía mecánica en enerxía eléctrica e tivo importantes aplicacións industriais no campo da xeración de electricidade.

Vídeo divulgativo (2´ 49´´) no que Jorge Mira, catedrático de Electromagnetismo no departamento de Física Aplicada da USC, nos presenta brevemente a teoría da relavitidade, formulada por Albert Einstein. Esta teoría reformulou os conceptos de espazo e tempo, a comprensión da orixe e evolución do Universo, e propiciou a entrada na era nuclear. O vídeo serve tamén de presentación da primeira tradución ao galego da obra "Verbo da teoría da relatividade restrinxida e xeral" (Einstein, 1916).

Vídeo de divulgación científica (6´ 33´´) , integrado na canle de Youtube “O Son das Ideas”, no que descubrirás en que consistiu un dos experimentos máis importantes da historia da física: o experimento de Michelson-Morley. Foi realizado en 1887 por Albert Abraham Michelson e Edward Morley e pretendía confirmar a hipótese da existencia dun éter (fluído invisible desprovisto de masa) que permitía a propagación da luz. O seu resultado negativo foi o primeiro chanzo no que se apoiaron posteriormente outros físicos para confirmar que a luz non precisaba ningún fluído para propagarse a través do espazo.

Vídeo de divulgación científica (6´ 08´´) , integrado na canle de Youtube “O Son das Ideas”, no que descubrirás como científicos do século XVIII desenvolveron o “experimento de Schiehallion”, que tiña como obxectivo medir a densidade da Terra. O astrónomo Nevil Maskelyne mediu a atracción gravitacional que exercía unha montaña sobre un péndulo e, a partir destes datos, o matemático Charles Hutton puido calcular a densidade media da Terra.

Vídeo de divulgación científica (4´ 48´´) , integrado na canle de Youtube “O Son das Ideas”, que che axudará a entender en que consiste a corrente en chorro, un fenómeno meteorolóxico que determina o clima nas nosas latitudes. Descubrirás como lle está a afectar o cambio climático a estas correntes de aire e tamén aprenderás que aplicación comercial teñen no ámbito da aeronáutica.

Vídeo de divulgación científica (1´ 33´´) que che axudará a entender que son os "quarks" (os elementos máis pequenos da materia) e de onde procede exactamente o seu nome, acuñado polo científico Murray Gell-Mann. Trátase da primeira entrega do "Dicionario da Ciencia", unha serie de audiovisuais producidos por GCiencia e presentados pola actriz Déborah Vukusic, que explican de xeito desenfadado diferentes temos relacionados coa ciencia. Na elaboración desta peza participaron Emilio Rodríguez (realización), Nelson Ribeiro (cámara), Déborah Vukusic (presentadora), Eduard Rolland (guión) e Paula Lago (deseño gráfico).

Vídeo de divulgación científica (1´ 52´´) no que descubrirás en que consisten dous conceptos da física, como son os buracos negros e os buracos de verme (tamén coñecidos como pontes de Einstein-Rosen). Esta peza forma parte do "Dicionario da Ciencia", unha serie de audiovisuais producidos por GCiencia e presentados pola actriz Déborah Vukusic, que explican de xeito desenfadado diferentes temos relacionados coa ciencia. Na realización deste vídeo participaron Emilio Rodríguez (realización), Nelson Ribeiro (cámara), Déborah Vukusic (presentadora), Eduard Rolland (guión) e Paula Lago (deseño gráfico).

Vídeo de divulgación científica (3´ 26´´), integrado na canle de Youtube “O Son das Ideas”, no que de xeito ameno e divertido, apoiándose en imaxes da serie Dragon Ball, se explican os tres principios fundamentais relativos ao movemento dos corpos, coñecidos como “Leis de Newton”.

Vídeo de divulgación científica (4´ 48´´), integrado na canle de Youtube “O Son das Ideas”, no que se explica en que consiste o “experimento da dobre fenda”, unha das probas precursoras do que hoxe coñecemos como física cuántica. Este experimento demostraría que, na escala micro, os obxectos teñen unha natureza dual, é dicir, poden comportarse como ondas ou como partículas; e o feito de que os observemos interfire no seu comportamento.

Vídeo de divulgación científica (7´ 20´´), integrado na canle de Youtube “O Son das Ideas”, que che axudará a entender como conseguen os tiraboleiros da Catedral de Santiago de Compostela bambear o botafumeiro, un incensario que pesa 60 kg e acada os 68 km/h.

Vídeo de TED (4´ 31´´) no que a astrofísica Burçin Mutlu-Pakdil nos explica como o seu equipo descubriu un novo tipo de galaxia, tan peculiar e diferente ás outras (hai máis dun billón de galaxias), que desafía as teorías e suposicións existentes sobre o funcionamento do Universo. Nesta charla descubrirás cales son esas peculiaridades que a fan tan excepcional. Tradución ao galego de Penny Martínez.

Vídeo didáctico (9´ 46´´) que che axudará a entender que é a reoloxía, a rama da física que estuda a deformación e o fluxo da materia. O profesor Francisco J. Otero Espinar, do Departamento de Farmacoloxía, Farmacia e Tecnoloxía Farmacéutica da Universidade de Santiago, explícanos neste vídeo cales son as diferentes formas de reacción dos fluídos fronte a un forza externa. Descubrirás, entre outras cousas, que partindo da “Lei de viscosidade de Newton” podemos diferenciar entre os chamados fluídos “newtonianos” (que se caracterizan por incrementar a súa velocidade de fluxo de forma proporcional á intensidade da forza aplicada) e os “non newtonianos” (tamén denominados “sistemas viscosos estruturais”), que modifican a súa resistencia en función da intensidade ou do tempo de aplicación da forza externa. Coñecer os comportamentos reolóxicos dos sistemas é esencial para o deseño e preparación de formas farmacéuticas estables baseadas nos sistemas dispersos heteroxéneos, como son as emulsións, as suspensións e os coloides. A peza forma parte da colección Vídeos didácticos USC.

Vídeo didáctico (6´ 09´´) no que Jorge Mira Pérez, profesor do Departamento de Física Aplicada da Universidade de Santiago de Compostela, nos fala da revolución que supuxo o electromagnetismo no século XIX. Partindo dos fundamentos teóricos desta rama da física (o electromagnetismo), o profesor Mira axudarache a entender como funciona a transmisión por radio. A peza forma parte da colección Vídeos didácticos USC.

Vídeo de divulgación científica (10´ 22´´) da canle AstroXabi, na que Xabier Pérez Couto explica conceptos básicos de astronomía e amosa as súas observacións nocturnas. Neste vídeo en concreto descubrirás que iniciarse na astronomía non é custoso economicamente, xa que non é imprescindible posuír un telescopio astronómico para achegarse de xeito afeccionado a esta disciplina. Para comezar, só precisas os teus ollos, un ceo libre de contaminación luminosa, un planisferio (que che permitirá saber que constelacións están visibles no ceo nunha data e hora concretas) e uns prismáticos. Tamén descubrirás cales son as aplicacións ou software que tes ao teu dispor para coñecer de xeito doado as características das diferentes constelacións, e cales son os manuais recomendados para achegarte aos conceptos básicos da astronomía.

Notas:

Das persoas participantes como falante ou como cadro técnico hai unha non identificada.