Galicia no tempo de Afonso X unha publicacións do Consello da Cultura Galega

Tipo: Libro Materias:

Ver publicación Descargar publicación

No ano 2021 cúmprense 800 anos do nacemento dun dos reis máis famosos, complexos e interesantes do noso pasado medieval: Afonso X (1221-1284). O Consello da Cultura Galega non podía quedar á marxe desta efeméride e, xunto a outras iniciativas, encargou a un grupo de historiadores, filólogos e historiadores da arte un volume en que se abordase a relación que o Rei Sabio tivo co reino de Galicia, coa súa cultura e coa súa lingua.

O mesmo monarca que foi quen de situar ao galego nun dos seus cumios literarios, coas Cantigas de Santa María ou coa súa lírica satírica, foi sinalado, entre outras cousas, como inimigo da Igrexa de Santiago, pouco entusiasta do fenómeno xacobeo, responsable do comezo da marxinalidade política de Galicia no conxunto da Coroa de Castela ou pouco proclive ao contacto coa nobreza e a Igrexa dun país que, por outra parte, nunca pisou durante o seu reinado.

Cal foi, en realidade, a relación de Afonso con Galicia e co galego? Neste volume preténdese dar unha resposta actual, poliédrica e afastada dos tópicos que máis recorrentemente condicionaron o estudo dun tema tan relevante. Malia a evidente predilección de Afonso X polos territorios do sur, sinaladamente Sevilla, este libro evidencia que Galicia seguiu a ser un dos reinos máis importantes para a Coroa, mesmo no plano financeiro. Ou que o cultivo literario da lingua galega foi en moitas ocasións, á marxe das claves afectivas ou persoais que contribúan a explicar o seu emprego, un recurso político habilmente empregado polo Sabio para promover os seus intereses e atacar os seus adversarios. Sen esquecer a importancia que os portos galegos tiveron na política afonsina ou as súas accións urbanizadoras no noso territorio.

Xa que logo, cómpre repensar o tópico da marxinalidade de Galicia nos tempos de Afonso o Sabio.

[Data da nota de prensa: novembro 2021]

Título	Galicia no tempo de Afonso X
Edición	José Miguel Andrade Cernadas Simon R. Doubleday
Autoría	José Miguel Andrade Cernadas Helena de Carlos Simon R. Doubleday Francisco Javier Hernández Olalla López-Costas Henrique Monteagudo Diana Pelaz Flores Francisco Javier Pérez Rodríguez Ricardo Pichel Gotérrez Rosa María Rodríguez Porto Beatriz Vaquero Díaz
Obxecto de estudo	Afonso o Sabio, X de Castela e IX de León-Galicia
Publicación	Santiago de Compostela: Consello da Cultura Galega, 2021
Edición	1ª edición
Descrición física	447 p.: il., cor; 24 cm
Notas	Este libro saíu do prelo o día 23 de novembro de 2021, cando se cumpren 800 anos do nacemento de Afonso X.
ISBN	978-84-17802-35-6
Depósito Legal	C 1911-2021
DOI	10.17075/gtax.2021
Url externa	Catálogo RBG
Evento	Exposición. Afonso X e Galicia Afonso X e Galicia. 25/11/2021. Capela de Santa María. Lugo Exposición. Afonso X e Galicia Afonso X e Galicia. 16/3/2022. Palazzo dell'Emiciclo . L'Aquila Presentación. *Presentación do libro Galicia no tempo de Afonso X.* 23/11/2021. Consello da Cultura Galega. Santiago de Compostela Exposición. Afonso X e Galicia Afonso X e Galicia. 5/5/2021. Centro Cultural Marcos Valcárcel . Ourense Exposición. Afonso X e Galicia Afonso X e Galicia. 12/1/2021. Igrexa da Universidade. Santiago de Compostela Exposición. Afonso X e Galicia Afonso X e Galicia. 12/1/2021. Igrexa da Universidade. Santiago de Compostela
Materias	historia política literatura Mulleres Idade Media lingua artes
Áreas	Centro de Documentación Sociolingüística de Galicia (CCG) Centro de Documentación en Igualdade e Feminismos (CCG)
Código QR